Aizawl: September thla tirah Thenzawl Peace City master plan thawktu tur thlanna neih fel hman tum a ni.
Chief Minister Lalduhoma chuan Thenzawl Peace City Master Plan siamtu tur zawnna kalpui meka an thlen chinte sawipuiin nimin khan a pisa-ah UD&PA thuneitute a kawm a. An inkawmnaah UD & PA Secretary Lalmalsawma Pachuau chuan, July ni 22-a Master Plan siamtu tur zawnna hmahruai Request for Proposal for selection of Consultant an tihchhuah thu leh company lian tak tak 18-in an ngaihven thu a sawi a. Heng Pre Bid Queries rawn nei zingah hian khawvel huapa company thate pawh an tel thu a sawi.
Ruahman anga thil a kal chuan, thla thar, September thla tir hian a thawktu tur thlanna hi neih fel hman tum a ni a, October thla atangin hna an tan ang a, tun sorkar kum chhungin Master Plan pawimawh zual chu peih fel hman an tum ang.
Mipui nuaih 10 vel chen theihna tur khawpui changkang (Modern sustainable, inclusive & planned city), Thenzawl Peace City din tumin sorkar chuan hma a la mek a. Ministry of Housing & Urban Affaira (MoHUA) chuan Master Plan siamna tur Rs. vbc 10 a rawn pe tawh a ni.