Himachal Pradesh khawpui, Shimla-a boarding school-a pawl ruk zirlai pathum, Inrinnia an sikul chhuahvahna atanga miin an ruk bote chu Pathianni khan chhan chhuah an ni.
Naupangte hi Kotkhai-a Chaithla vengah hmuh chhuah an ni a. Police chuan mipa kum 45 mi, Sumit Sood-a chu mi ruk bo leh an nu leh pate vaua puhin an man a, thubuai an siamsak.
Naupang ruk bo zinga pakhat hi Punjab-a Modali-a politician pakhat fapa niin pakhat hi Karnal, Haryana-a independent councillor laina a ni a. Pakhat dang hi Himachal Pradesh-a Kullu-a cheng a ni thung.
Police chuan an pathum hian Shimla atanga km 58-a hla, Kothkai-a building chhawng linaa pindan kalh hnan chhungah an lo awm niin an sawi a. Pindanah hian gmai tuamna, hruizen leh hmanraw hriam an hmu bawk tih an sawi.
A rutu hian ram dang phone number atangin a ruk bo mipa naupangte nu leh pate chu a bia niin an sawi.
Naupangte hi Inrinni chhun dar 12:09 khan an sikul atang hian an chhuak a, tlai dar 05:00-a an haw hun turah pawh an haw tak loh avangin an hnenah thlen a ni ta niin police hian an sawi.
New Shimla Police Station-ah sikul principal-in a thlen angin Bharatiya Nyaya Sanhita Section 137B (kumtlinglo ruk bo) tlawhchhanin thubuai ziah luh a ni.
Police chuan naupangte hi an sikul atanga an chhuah hnuah car-in Shimla chuan chung lam an pan tih an sawi.
Anmahni zawng hian police 150, drone leh cyber team thawk chhuakin an bei zui nghal tih New Shimla Police Station SHO Manoj Thakur-a’n a sawi.
An fate an bo tih an hriat hian an chhungte chuan Chief Minister Sukhvinder Singh Sukhu-a pawh hmu nghalin ngaihvenpui turin an ngen a ni.
Shimla Deputy Commissioner Anupam Kashyap-a chuan naupangte hi lak chhuah an nih hnuah an hriselna dinhmun endik a ni tih a sawi a. “School activity calendar pawh he thil thleng avang hian ennawn a ni dawn a, zirlaite himna tur pawh duan thar a nih phah dawn a. Nu leh pa leh sikulte pawh kan fimkhur zual a ngai a ni,” a ti.
Naupangte himna tura inkaihhruaina pawh tihchhuah thuai a ni ang tih Kashyap-a chuan a sawi bawk.