US Open 2025 chu August 24 atanga September 7 chhungin an khel dawn a, kuminah hian lawmman an tipung nasa hle a, lawmman atana pawisa an dah hi $ maktaduai 90 zet a tling dawn a, tennis huangah chuan pawisa tam ber tum a ni dawn.
2024 US Open-ah khan lawmman chu $ maktaduai 75 a lo ni tawh a, kha pawh khan tennis huanga pawisa tam ber record siamtu ni tawhin, kuminah hian 20% zetin a pun belh a, record thar an siam zui leh dawn a ni.
Mipa leh hmeichhe maltan champion-te chuan $ maktaduai nga ve ve an hawn thei dawn a, kum 2024 khan maltan champion-in $ maktaduai 3.6 an dawng a, a punna hi 39% zet a tling.
Maltan champion-te lawmman chauh a pung lo a, final lutte dawn tur pawh $ maktaduai 2.5 niin a punna chu 39% a ni a. Semi final lutte pawhin $ maktaduai 1.26 an dawng ang a, 26%-in a pung a, quarter final lutte dawn tur chu $6,60,000 niin a hma aiin 25%-in a pung bawk.
Round of 16 lutte chuan $4,00,000 an dawng dawn a, hei pawh a hma aiin 23%-in a pung bawk a ni.
Mipa leh hmeichhe double lawmman pawh a pung dawn a, a hma aiin 23%-in a sang ang a, kum 2024 khan $ maktaduai 3.89 an dah hrang a, kuminah chuan $ maktaduai 4.78 an dah hrang tawh dawn a. A vawi khatna atan mipa leh hmeichhe double bakah mixed double champion-te chuan $ maktaduai khat an dawng dawn a ni.
He inelnaa tel zawng zawngte chu kut ruaka hawtir an tum lo hle a, a tel hrim hrim chuan zinna senso $1,000 an dawng vek dawn a, hei bakah hian a thlawnin khualbuk thlan bikah an thleng thei dawn a. Thlen duhna bik neite chuan ni khatah thlenna senso $600 an dawng zel dawn bawk.
Hei mai hi a la ni lo a, player-te hian round tinah an racquet chu man chawi loin vawi nga zel an kaihtir thei dawn a ni.