I zak hmul kha engtin nge i tihfai thin? I pawt nge, i met? Zak hmul meh phei hi chu a aia nasain an to duh khawp a. A pawha pawh lah hi a nain vun a tichhe thei hial mai bawk.
Bawng Hnutê leh Aiêng
Bawng hnute thirfian 2 leh aiêng thirfian khat a ni mai. A chunga kan sawi bawng hnutê thirfian 2 leh aiêng thirfian 1 khi no ah pawlh la, uluk deuh takin chawk kawi la. Tichuan i zakah khan hnawih rawh. Minute 15 vel emaw i nghak ang a, a lo hul hunah tui thianghlimin i sil leh dawn nia. Hetiang hian chawlhkar hnih vel, nitinin tithin la, a that zia a lo lang nghal mai dawn a ni.
Artui leh Vaimim
I mamawh chu artui pum khat leh vaimim her phut (dawrah lei tur a tam) no chanve vel a ni mai. A chunga kan sawi ang tho khian i pawlh ang a, i zakah i hnawih ang. Minute 20 vel i nghak ang a, tui thiang-hlimin i sil fai leh mai ang. He tihdan hi i hmang zawk dawn a nih chuan kar 1 ah vawi thum vel ti la, kar hnih chhung tal ti rawh. Mak deuh maiin i zak hmulte chu an bo telh telh mai ang.
Chini leh Lemon Tui
A chunga tihdan chi hnihte khi an remchang ta lo fo a nih chuan tih dan dang a la awm. I mamawhte chu chini thirfian khat leh ser thur (lemon) tui thirfian hnih a ni leh mai. Tha takin i pawlh leh ang a, i zakah i hnawih leh mai ang. Lemon kha a phela hman law law i duh leh i lemon phelah khan chini kha hnawih la, tichuan i zakah i hnawih (tât) tawk tawk mai ang. Chini a lo tlem deuh leh i belh leh ang a, i tat leh zel ang.
Hetia i hnawih zawhah minute 20 vel emaw i nghak leh hrih ang a. Tichuan, puan pan nêm tak, tui thianghlima chiahin dim te tein i hru fai dawn nia.
Hei hi chu nitin i tithei ang a. Chawlhkar 2 emaw tal i i tih a tul ve tho bawk ang.
Chawlhkar hnih
Han ngaih mai chuan a reiin a buaithlak, ka nghak peih lo i ti mai thei a. Mahse, damdawi (chemical) hmanga tum khata tihfai duak emaw, vawi khat thil thu-a pawh fai vek emaw kha i zak vun tan a tha lo em em zawk a ni.
Vanduai phei chuan vun atanga natna hrik lutin hrisellohna lian tak a thlen thei zawk a. Hrisel tha pangai leh side affect awm lo tur chuan tlêm-a-zawng chu i nghah ve a ngai a lawm! A chunga tihdan chi thum atang khian i remchan dan ber hmangin i zak hmul kha tireh rawh le.