UN human rights office chuan Israel-in tum bik neia Gaza-a mi a beihnaa chanchinbumi paruk an thi chu an dem tih sawiin khawvel huap mihring nun dan ‘palzutna rapthlak’ niin an sawi.
Pathianni zana Israeli thlawhnain a beihnaah correspondent hriat hlawh tak, Anas al-Sharif-a telin Al Jazeera chanchinbumi paruk an thi a, freelance journalist pakhat a thi tel bawk.
Israeli sipaite chuan Sharif-a hi ‘Hamas terrorist cell hotu ber’ nia sawiin an that tih an sawi.
Chanchinbumite dikna chanho humhalhtu pawl leh Qatar telin, ram tam takin he beihna hi an dem a. Prime Minister Sir Keir Starmer-a thupuangtu pawhin UK sorkarin ‘a ngaihven hle’ tih sawiin a hrana chhui an duh tih a sawi.
Sharif-a leh Al Jazeera correspondent Mohammed Qreiqeh leh cameramen Ibrahim Zaher, Mohammed Noufal leh Moamen Aliwa te hi an awmna puan in beih a nih tuk, Thawhtanni khan Gaza City-ah vui an ni.
al-Shifa damdawi in chuan chanchinbumi thi ve dang hi Mohammad al-Khaldi a nih thu an sawi tih Reuters news agency chuan sawiin mi dang pakhat a thi bawk tih an sawi.
Chanchinbumite zalenna atana beitu, Reporters Without Borders chuan Sharif-a chu thah a nih thu sawiin an dem tih an sawi.
Foreign Press Association pawhin tum renga thah chu tha an ti lo tak zet tih sawiin Israeli sipaite hian Palestinian chanchinbumite chu ‘finfiahna tha awm si lovin helah an chhuah fo’ tih an sawi.
Committee to Protect Journalists (CPJ) chuan beihna pawi an tih thu leh Israel chuan an thah chhan an sawi finfiahna tha tawk an nei lo tih an sawi bawk.
Israeli sipaite erawh chuan Gaza-a lehkha an hmuhah Sharif-a hi Hamas a ni ngei tih an chiang tih an sawi a. Hetah hian ‘mi chet velna, mi firfiak inzir chhuakte list, phone directory leh hlawh inziahna’ pawh a awm niin an sawi.
Sharif-a hi Israel-in an thah hmaa social media-a thu a tar lan thenkhatah chuan Hamas a sawiselna a lang nasa.
CPJ chuan October, 2023-a Israel sipaiten Gaza an beih atangin chanchinbumi 186 vel thah an nih tawh thu sawiin kum 1992-a an chhinchhiah atangin chanchinbumite tana hun thim ber a nih thu an sawi.
Israeli sorkar hian Gaza-a Hamas an beih hnuah ram dang chanchinbumite luh an phal lo va, thu thar awm pawh Gaza-a awmte sawi atangin chauhvin an hre chhawng a ni.
Israel hian October 7, 2023-a Hamas-in an ram chhim lam beia mi 1,200 chuang an thah leh hren tura mi 251 an hruai atangin Gaza hi an bei tan a. Hamas health ministry chuan indona chhuah hnuah mi 61,430 an thi tawh niin an sawi.