Congress President Mallikarjun Kharge-a chuan Thawhtanni zan khan INDIA tangruala tel MP-te tan zanriah a buatsaihsak a. Sharad Pawar, Sonia Gandhi leh Rahul Gandhi te pawh telin eptute hian Bihar-a electoral rolls revision leh vote thlak tihchingpen chungchanga hma an lak dan turte an sawiho.
Samajwadi Party atangin Akhilesh Yadav, Dimple Yadav leh Jaya Bachchan; DMK atangin K Kanimozhi leh TR Baalu; RJD atangin Misa Bharti; Shiv Sena (UBT) atangin Sanjay Raut leh Priyanka Chaturvedi leh Congress atangin Priyanka Gandhi Vadra te pawh Hotel Taj Palace-a zanriah kilhonaah hian an tel.
INDIA-a tel MP zawng zawng deuhthaw an kim bakah tangruala tel ve lo, AAP MP Sanjay Singh leh Sandeep Pathak te pawh an tel bawk.
Tun hnai lawkah Congress hruaitu, Rahul Gandhi-a chennaah INDIA hruaitute hi zanriah eiin Bihar-a Special Intensive Revision (SIR) neih chungchang an lo sawiho tawh bawk a. Hemi tum hian vote neite ennawn chu ‘BJP leh Election Commission-in vote tihchingpen an tumna’ niin an sawi.
Tun tum hi Lok Sabha inthlan hnu lawk, June, 2024-a Kharge-a ina an thutkhawm hnua an thutkhawm lehna hmasa ber a ni.
An thutkhawmnaah Gandhi-a’n BJP-in Election Commission hmanga ‘vote tihchingpen a tumna’ chu a sawi fiah.
Thawhtanni vek khan chawhmaah Gandhi, Kharge leh Pawar-a hovin eptute hian Parliament House atanga Election Commission pisa thleng Bihar-a SIR kalpui duh lohna lantir nan kawng an zawh a; mahse, thui an kal hmain police-in an lo dang a, an zinga thenkhat an hreng nghe nghe.
Eptu MP-te hian lukhum vara a sena kraws awm, ‘SIR’ tih leh ‘vote chori’ tih inziak khumin Parliament-a Makar Dwar atangin EC pisa an pan a, placard leh banner keng bawkin police hian PTI Building pawnah dalna an lo siam a ni.
MP thenkhat chu kawngah thuin an au rual a, hmeichhe MP-te chu lo dalnaah hian an lawn a. A hnuah police-in bus-ah luhtirin Parliament Street Police Station-ah an kalpui a, a hnuah chhuah leh vek an ni.
“Hei hi politics-a inbeihna mai a ni lo va, danpui chhanhim tumna a ni a. He beihna hi ‘mi pakhatin vote khat’ tih vawn nun nan a ni a, voter list dik leh thianghlim kan duh a ni,” tiin Gandhi-a chuan bus-a an hruai hnuah a sawi.
Police station atanga an chhuah hnuah, “Ram pum hmaah thu dik an sawi thei lo,” a ti a. “Hetiang hi Bengaluru-ah a thleng bik lo va, ram puma bial hrang hrangah a thleng a. Election Commission hian a hre vek a, he data hi a darh vek tih pawh a hria. Thup leh thunun an tum chu kan hawng dawn a, kan tidarh vek dawn,” a ti.
Gandhi-a hian Ningani khan 2024 Lok Sabha inthlanah khan Karnataka-a Mahadevapura assembly bial huam chhungah ringawt pawh tih dan hrang hrang pangain vote nuai khat chuang ‘ruk’ niin a sawi a, heng zingah hian voter lem, address lem leh dik lo te pawh a tel tih a sawi.
Eptute hian Bihar-a SIR kalpui an duh lohna hi parliament in hnihah pawh nasa takin an duh lohna an lantir a, EC thil tihdan chu kumin kum tawpa assembly inthlan lo awm turah ‘voter paihna’ niin an sawi.
Rorelna in hnihah SIR sawiho an phut chu hnawl a ni a, sorkar chuan parliament-a danpuiin a din pawl (body) chet dan lo sawi chu a rem lo niin an sawi a ni.