- Dr. J.T. Vanlalngheta; Advocate, Writer’s Lexis & Law
Tu nge mi chotu chu? Engtin nge ka lo invên anga, engtin nge ka lo chhan ang? Kut tum nen em ni ang? Hnai lo ve. Min chotu chhân lêt nâna kut tum emaw, silai emaw ka lek a nih chuan, â tak, mahni chhiat zelna tûra thil ti ka ni ngei ang. A nih, engtin nge ni ta ang le?
Tunlai khawvel thiamna sân lutuk tawhnaah hian mi account rawk te, pawisa ti phung vak tura insawmna te leh social media: whatsapp, IG, Facebook, adt hmangtute ti buai theiin ze hrang hrang nei bumna ang chiin he pa pui roh (AI) hian, thil tha tam tak a tih laiin, kawng lehlamah ve thung chuan a ze pâwnlâng a rawn chhuah hmasa a, chu chu kan lo hma chhawn ta zeuh zeuh ta a nih hi. Hetiang hi thil lo awm tur reng a ni. Daniala lehkhabuah pawh, ” ….mi tam tak an tlân vel ang a, hriatnate a la pung dawn a ni…” tih thu kan hmuh hi (Daniela 12. 4b&c); chu hriatna pung ta vak chu Pathian ropuina a ni fo mai ni lovin, a huat zawng tak pawh a tel zel ang tih hi ringtute tân hrilh lawk ngam a ni.
Tunlai khawvela mipuite hnena dikna thlentirna dan leh hrai peng hrang hranga finna siam chawp emaw, mihring lem, a then a zar hman a nih tawh chinah hian dan siamtu, hmangtu, lek kawhtu leh thu buai, hla buai remtute chotu a lo awm thei ta a, chu chu engtia tih tur nge ni ang tia inrawn khawm a ngai ta a ni. A nih leh chu’ng chonate chu khawi atanga lo kal nge tih kan inzawt nghal ngei ang. A chhânna chu computer hmanruaa hna thawh dan hrang hrang algorithm-ah hian awmin, tan lam nei ngal programme siam sa ‘ algorithmic bias’ an tih te, chu mihring lemin kaw chhûng dum lai ‘blackbox’ a neih si avanga a thu tih tluknaa thil inthup leh lang tlang lo a awm theih vang te, state sawrkar inrelbawlnaa dan awm sa dik tawk lo awm theite lâk sawn a hnêka ti nghet zawktu a nih theih avang te a ni. Hengte hi Artificial Intelligence (AI) hman tak tak hmaa lo chin fel vek tur a ni, AI-in a dân awm sa intluk tlân lohna awm palh leh awm sate a tha zawnga thlak danglam a hnêkin a rawn tih ngheh zawk dawn avangin inven lawk a ngai a ni. Dik taka ro relna dodal theitu dang leh chu: A dik a dawk thlu lova AI-in hna a thawh dan kuah khawma thununtu dân rel (legal framework) awm loh vang te, hre lo turte pawhin an lo hriat pawisakna nei hauh lova mi mal thu rûk a lo sem chhuah ve ngawt theihna te leh AI ro rel achunga mawh phurtu bel chungchang te chu ro reltute kalhtu, a rûka chona, chhâng let tura kan la inpeih si loh, dan siamtu leh lek kawhtu, thu buai remtu leh dan hre mi (lawyer)te hmaa chona inchhawp thar chu a ni.
Chotu chu:
- Hleih neihna leh fair lohna (algorithmic bias): He mihring lem taksa leh kawchhunga hna thawhtu pêng hrang hrangte hi hriatna (data) awm sa ringa hna thawk an nih avangin, henga thil lo awm sate hi intluk tlan lohna leh hleih neihna lam hawi a nih hlauh chuan, chungte chu a thu tih tluk nan behchhanin a hmang nghal a, siam rem hna thawk lovin a awm sate chu a ti nghet zual sauh dawn a ni. Entir nan, kan sawrkar inawpnaah hian, hna hniam lam Group ‘D’ adt hna ruak dil thei chin hi bi thliah ila, a pawl sang ber berte thlenga diltir lovin, lehkha zir zata a dil âwm takte chauhvin dil theih ni se. Chuti ni lova hna ruakah a pâwl sang apiang kan la thin a nih chuan mi lehkha zir hniam zawk pawl 8, pawl 10 leh 12 adte chu graduate, master’s degree, doctoral degree, adt neiten an luah lan kumkhua mai ang; tichuan, hna an hmuh hunah, hna tha dang zawngin an buai leh ang a, mipuiin office an dawrin,… A awm lo, chu chu a exam…,” tih ang te, pisa ti buaitu hi kan siam tam tial tial palh thei. Hna hrim hrim hi a dil thei tur thiamna hlawm khawm (qualified group for candidates) hi siam ni ta se. Hei hi entirna mai a ni, kan ûm zui hman rih lo vang.
- Lan tlang lohna leh sawi fiah theih loh (lack of transparency and explainability): Artificial Intelligence hian pumpui lang tlang lo (blackbox) ang chi hi a nei hrim hrim a, hei hian hleih nei taka thu tlukna a siamtir thei a, mahse, khawvel thiamnain hei hi a siam tha thei ang em tih chu ngaihtuahna ti thuitu a ni reng.
- Mi mal thu rûk himna (data privacy and security): AI hian, mi mal thu rûk thlengin, a hna thawh nan hriat tur tam tak a mamawh a; hetiang mi mal thila pawi thei ang chi leh dan phal loh thil huanga a va luh rûk dûk dûk loh nan, a zawm ngei ngei turin dân (legal system) pawh hemi chona hma chhawn thei ngei tura siam that ve zel a ngai a ni.
- Thil tiha mawh inphurhtirna (accountability and liability): AI hian mi dangte pawi lo khawih ta se, tu’n nge mawh phur angt A siam chhuaktu (developer) nge, a hmangtu nge, a kawchhung (system)t Dân lên hrui phiar (legal system) chuan heng mihring lemin thu tlukna a siama thil sual a tih a, awh/man chhuah a nih theih nan, hna thawhnaa a hmanrua leh a mawh phurhna leh hrem theih a nih dan zawng zawngte siamin ram ri a khamsak vek a ngai a ni.
- Mahni hna thawha neitu nihna hauh theihna (intellectual property and copyright): Zai mite, thu ziak mite, lem ziak mite leh mi tam takin an thil tih chhuah achu’nga thu an neihnate hi AI-te hian copyright chungchanga zirtirna pêk an nih lai hian an dai lut vê mawlh mawlh a. Chuvangin, he mihring lem hian hna ropui leh mawi tak (creative works): ri mawi (music) leh a dangte a siam chhuah ve theih avangin a thil deh chhuah chu tu nge a neitu dik tak (copyright owner) ni ta ang let Tunlai dan chipchiar tawh hunah hian hei hi chona tling a ni bawk.
- Mihring ro rel leh court indaidanna a nghawng dan (impact on human judgement and judicial independence): Mihringte hian an ro rel nan leh thu tih tluk nan AI-a an innghah lutuk chuan an thiamnate leh fim taka thu an tih tluk theihna te chu a ti kiam ngei dawn a, chu chuan dikna nih phung dik tak (quality of justice) a tih hniam theih dawn avangin dan hmanga ro relna tlat fâlna/ indaidanna (independence of judiciary) a ti danglam thei dawn bawka hriat a ni; chu vang chuan, mihring ro rel thiamna tih hniamtir lo emaw, luahlantir emaw lo va dan hrui zamte chu ruahman zel a ngai dawn a ni.
- Dân leh hraia thil hmaihthelh awm leh chian lohna (regulatory and uncertainty): AI thang zel hian ama hna thawh nan mihring dan hman lai thang zelte hi a lehpelin a duh ang angin a hmang mai thei zel a, hei hian hriat lohna khawvelah min rawn chêntîrin, AI hmangtu sumdawng pawl leh mi malte chu dan zâwm chunga thil hlauhawm sut tur (legal risk) min siamsak phah a ni.
Hma sawnna kawng zawh zelin, he’ng min chotu kan sawi zawng zawngte hi pumpelh theih ngawt a ni dâwn lo va, thiam taka hma chhawn thei zel tur hian dan siamtute leh mi tin kan inlâk fit ve zel a ngai dawn hle mai.