Aizawl: Disaster Management & Rehabilitation (DM&R) Minister Prof. Lalnilawma chuan nimin khan National Disaster Management Authority (NDMA) hotute chu a pisa-ah kawmin, khuarel chhiatna hrang hrang laka inven dan tur an sawiho.
An inkawmnaah hian Mizoram chu khuarel chhiatna thlen nasatna hmun a nih anga district tina khuarel chhiatna hrang hrang leimin, tuilian, lirnghing leh adangte, thlen theihna enho a ni a. Mizoram chhunga khuarel chhiatna liantham lo thleng tawh hrang hrangte – 1992 Hlimen leimin, 1995 Siaha leh Lawngtlai-a ruahpui vanawn avanga chhiatna, kum 2013-a Laipuitlang leimin, 2017 tuilian leh 2020-a Champhai-a lirnghingte pawh chipchiar taka enho a ni.
DM&R dept official-te leh NDMA hotute chuan khuarel chhiatna avanga harsatna thleng thei tihziaawm dan leh chhawmdawlna kawnga chak zawka thawhho dan tur hrang hrangte an sawiho bawk.