Triumph Motorcycles India chuan India hmarchhaka an dealer pasarihna, Revolve Automobiles chu Nilaini khan Aizawlah an hawng a. Showroom tharah hian bike chi 17 zawrh chhuah nghal a ni.
Chaltlang road, Chanmari-a showroom thar hi Transport Minister Vanlalhlana’n a hawng a, “Khawvel hmasawn rualin Mizoram pawhin a sawn ve zel a. Hmasawnna a awmin kil tin hmasawntir tur a ni a; khawvela bike tha ber, Triumph dealer dawr hawn a ni pawh hi hmasawnna a ni a, hma lam kan pan tihna ni,” a ti.
Minister hian Dealer Principal Roger Zoremthanga nen an bike zawrh chhuah hrang hrangte an khuh hawng nghal bawk.
Mizorama a zawrhna a awm hma hian Triumph bike nei an awm nual tawh a, Triumph Mizoram tia hming invuahin an president, Franklin Lalrinngheta chuan a hma chuan an bike a chhiatin Kolkata atangin siam tur an chah a, kal man an tumsak a, a hautak hle thin tih a sawi a. Aizawla a zawrhna leh a siamna hmun a awm ta chu a lawmawm ta zet tih a sawi bawk.
Revolve Automobiles-ah hian Triumph bike chi hrang hrang 17 zawrh chhuah nghal a ni a. Heng zinga 14 hi 400cc niin ‘big bike’ tia an sawi, 400cc chung lam pathum – Daytona 660, Street Triple leh Speed Twin an kawl bawk.
Aizawla Triumph showroom thar hi India hmarchhaka a pasarihna niin India ram pumah 137-na a ni thung.
Triumph Motorcycle hi British bike niin UK, North America, France, Germany, Spain, Italy, Japan, Sweden, Benelux, Brazil, China, leh Thailand-a miin an khalh nasat ber ber bike ni a. India-ah hian Bajaj Auto nena thawk dun an ni a, 500cc hnuai lamte chu Pune-a Bajaj hmun, Chakan-a an siam a ni nghe nghe.
Triumph bike zawrh chhuahna dawr hawn tak hi bike showroom a nih bakah servicing an ti thei a, spare part leh accessory an kawl a. Loan-a bike lei duh tan pawh thawktuten an buaipuisak thei bawk.