Everton striker hlui, Dominic Calvert-Lewin-a chuan Leeds United zawm turin medical a tifel thuai dawn a, Premier League kai thar team nen hian man awm lova inla lut turin an inrem tawh.
Kum 28 mi hian kum kua a awm hnuah Everton hi June thla khan a chhuahsan a, a chhuahsan tur chu ‘thutlukna siam harsa tak’ niin a sawi.
Calvert-Lewin hian Sheffield United atanga kum 2016-a £ maktaduai 1.5-a a zawm hnuah Everton tan vawi 273 inlanin goal 71 a thun.
Leeds hian hmatawngah Joel Piroe leh Lukas Nmecha an nei sa tawh bawk a, hetih lai hian Patrick Bamford erawh chuan manager Daniel Farke-a ruahmanna ‘a tel tawh lo’ tih hriat a ni a, Mateo Joseph-a’n loan-in Mallorca a zawm tawh bawk.
Calvert-Lewin-a hian 2020-21 khan a season tha ber hmangin Premier League-a vawi 33 a inkhelhah goal 16 a thun a, England squad-ah telin European Championship-ah final an lut nghe nghe.
A dawt chiah season-ah erawh a inhliamin a tibuai a, a goal thun theihna a tlahniam zui a, 2024-25 season pawh khan vawi 26 a luh zinga a zahve aia tam mah chu bench atanga a luh a ni.
England tan vawi 11 inkhel tawhin goal li a thun tawh a, kum 2021 hnu lamah erawh a la khel leh lo.