- K. Hmingthankaia
Ni 13.8.2025 zinga ka fanu-ten video viral pakhat min entir chuan ka thin a ti er leh ta at mai a. City bus chungchang hi engmah ka ziak tawh lovang ka lo ti tawh naa, ziah leh a ngai ta a nih hi.
Sawrkar hmasa lam atang tawh khan, City bus stand-a ding rei thin lutuk hi ka lo sawisel fo tawh a. Smart City nih nen pawh a inhmeh loh thute, state dang tih ve dan a nih loh thu leh hnamdang lakah a zahthlak thute, Bus-in stand-a passenger nghak lovin, a chuang turte chuan stand-ah bus an lo nghak zawk anga, bus lo thlen veleh a chhuk tur an chhuk zawhah lawn zung zunga kal leh mai theih a nih thute ka lo sawi tawh thin. Tin, City bus hi tu thunun tur ber nge? Sawrkar, STA nge, AMC nge ACBOA tihte ka lo zawt tawh.
City bus stand-a ding rei thin lutuk hi ka ngaimawh em avangin, tun ZPM kalphungthar sawrkar intite hunah pawh hian an tihdanglam mai beisei takin ka lo ziak leh tawh a. Mahse, sawrkar tan ngaihpawimawh tham loh a ni ange. Kan ram hmel lanna leh, mipui tana awlsamna tur, public transport man tlawm ber hi anni pawh hian an term tawp thleng pawhin an tidanglam thei dawn lo a ni mai thei. A hmaa mite ang bawkin tih tur tul dang, khuallian nih leh hawn tur neuh neuh an la ngah a ni ange.
Durtlang lam atanga sikul kal tur naupangte city bus hnunga an bet far mai han hmuh zet chuan ngaihtuahna a kal thui duh hle mai. Hmanlai thil deuh emaw, thingtlang khua leh mi ram khawimaw laia an tihdan ni awm tak a ni a. State Capital, Smart City meuha thil awmdan a ni si a. Sawrkar leh department hrang hrangte, a khawtlang ang zawng pawha ngaituah hmasak tur leh tih hmasak tur kan tih thin loh zia leh, thu tha pui pui leh changkang tak tak mipui hmaa sawi fo ringawt chauh hi a tawk loh zia a lang chiang hlein ka hria.
Chu ai maha ka la huat chu, heng naupang mangangte Institution dang bus-in an phurh thin chungchanga Aizawl City Bus Owner Association-te thil tih dan hi a ni. He video viral comment-a kan hmuh ang hian, heng naupang mangangte phur thintu Institution, Women Polytechnic-te, Hindi Training College-te, HBC-te leh a dangte hnenah ACBOA hian lo phur tawh lo turin lehkha an pe tih hi tak tak a nih chuan, an va zaktheilo ve le. Eng hnam leh eng Society nge kan nih tak? Khawnge hmana Mizo, khawnge hmana Mizo Kristiante kha? Hetianga anmahniin an phurh hman loh leh an phurh sen loh, naupang sikul tlai hlau mangangte an lo phurh chu enge a pawina? A tha hle a ni lawmni? Hetiang leh zel pawh kan itsika nih chuan, private motora mi inphur thin pawh hi kan itsik zel mai dawn emni? Tu pawhin an motor-ah chuan an duh duh an phur ang chu. ACBOA hian khap theihna an nei em ni? Kan ramah hian thatnate, felnate, diknate leh dan rorelnate hian awmzia a nei ta lo emni?
Heta an sawi ang chuan, city bus-te hi Sihphir lam atangin an rawn khat vek tawh thina, a chang chuan stand thenkhatah phei chuan an ding duh lo an la ti nghe nghe a ni. Chuti a nih a hnu, an chuang thei dawn nge dawn lo, eng hunah nge a lo thlen dawn, tih pawh an hriat hleih loh lo nghah ngawt ai chuan, a rem remah hunbi nei, tlai hlau chu an duh duh danin an kal mai ang chu. Lo nghak reng se, chuang leng leh silo se emaw, motor chu chhiain lo thleng lawk thei leh silo ta se, engtinnge an awm ang. Chubakah, city bus-a tawt deuha chuan ai chuan thawl nuam deuha chuan te pawh an duh ang chu. Mi motor chuan dan tur leh mi phurh tur chungchangah hian ACBOA hian enge thuneihna an neih? Tunhma mawl zual lai khan taxi stand atanga taxi dang lo tlan laia lo chuan kha kha stand amite khan a haw thina. A driver emaw, passenger emaw chu an hau thin. Intihbuai fe-na pawh a thleng tawh thin. Engtikahnge an motora khat khawp passenger an awm dawn tih pawh hriat hleih loh nghah kha kan ba lo. Kan duh duhnaah kan chuang ang. Chutianga mi chungah emaw, ka tel venaah emaw thil thleng ka hmuh chuan ka hau hrep thin. Chutiang ang vel chu a ni tuna ACBOA te thil tih dan hi.
City bus chungchang ka ziah thenkhatah phei chuan, pawisa min kir tur hi conductor- te hian an theihnghilh derin, kir loh dan ngawt an ngaihtuah niin ka hria, tih leh, pawisa kir tur hi dil leh zak se min ti niin ka hria tihte leh, a lang a paua pawisa duhna tilang nasa ber chu city bus-te hi an ni awm e, ka ti nghe nghe.
Stand-a an din rei chhan hi ACBOA President ka zawt a, ani chuan, Driver leh Conductor_te tilo tura an hrilh nasat thin thu leh, anmahni thua an lo tih leh thin thute, chutiang veng tura Line Supervisor leh Asst. Superviser an rawih thute min hrilh a. Tin, mipui pawhin stand-a ding rei chu an hnena report theih a nih thute a sawi a ni. Mahse, tun thleng hian kan la ding veng veng thin chu a ni a. Hei hi engdang vang ni lovin, an mahni leh mahni an itsik vang, midang phurh ai phur ila, tih leh, kan phurh tur midangin an phur ang tih an hlauh vang mai mai a ni. Ram leh mipui lam ngaihtuah pha ve lo, nikhat thil thua ban mai theih driver leh conducto-te hian, nikhat thil thua hlep ruk tur neih tam loh an hlauh vang chauha hetia awm hi kan ni. Stand-a ding reng lova tih dan chu a awm ang, mahse, a ti thei ten an ti duh si lova. Smart City-ah hian City Bus-te chu Driver leh Conductor-te thu thuin an tlan vel a nih hi.
Miten engahmah an ngaih ve loh, sawi fo pawha sawt si lo, hetiang thu ho te te sawi fotu nih pawh hi a zahthlak a, ka sawi tawh lovang ka ti naa, tun tuma video viral pakhat avang hian kan sawi leh ta hram a ni e. Mahse, bus chhunga lungawilo phun sur sur chu ka hre fo si.