Aizawl: Chief Minister Lalduhoma’n ruihhlo hian eng thil tha mah a thlen loh avangin ban phak lekah awm mah se thalaite chu eng ruihhlo mah tichhin lo turin a chah.
Nimin zing khan Mizoram State Level leh Aizawl District Level huaihawtin Nasha Mukt Bharat Abhiyan (Drugs Free India Campaign) neiin, kawng zawh huaihawt a ni a. Chanmari leh Sikulpuikawn atanga kawng hi zawh niin, Lammualah lut khawmin kawngzawh kharna buatsaih a ni a. Chanmari atanga kawng zawhte hi Chief Minister hian a vailiam a, an zingah tel ve nghalin Lammual thlengin kawng a zawh.
Kawngzawh khatna inkhawmah thu sawiin chief minister chuan, Mizoram hi ruihhlo siamna hmunpui an tih mai, Golden Triangle depa awm a ni a. A kal kawnga awm an nih vangin ruihhlo hi hmuh tur a tam thin tih sawiin, “Ruihhlo hian eng thil tha mah min pek loh avangin, kan ban phak lekah awm mah se kan ti ve tur a ni lo. Kan thalaiten eng ruihhlo mah hi lo ti chhin suh u. Tih chhin hi a bawiha luhna kawngka a ni,” a ti.
Ruihhlo a ruka zuarte pawh khawtlang hian hnawl ngam tura chahin, an phu tawk hremna hmu ngei se a duh tih a sawi a. Ruihhlo bawiha tang mekte pawh huaisen taka kalsan ngam turin a chah.
Kawngzawh khatna hunah hian Health Minister Lalrinpuii leh Excise Minister Lalnghinglova Hmar te pawhin thu an sawi.
Kawngzawhah hian Aizawla sikul leh college hrang hrang atanga zirlai 600 chuang an tel a. Kawngzawhtute hian thuziak kengin an au rual bawk.