August 1 atanga Mizoram pum puia electric billing system thar hman avangin electric bill hmuh that zawk beisei a nih bakah sorkarin sum leh pai eng emaw zat a hum thei dawn.
Nimin khan Power Minister F Rodingliana hovin a pisa-ah P&E department hotute chuan an hmalakna hrang hrangte thlirhoin an thukhawm a. Electric billing system thar hman tan a nih tirah electric bill chungchanga harsatna awmte pawh tihfel thuak a nih tawh thu sawi a ni.
Thutkhawmah hian billing system tharah hian consumer-ten bill pekna counter pan kher ngai tawh lovin mobile application (PEDM) hmangin Mizoram khawi hmun atang pawhin, mahni awmhmun atangin eng chhitna bill a pek theih tawh a, hei hian electric hmangtu consumer-te tan nasa takin awlsamna a siam a, department tan pawh inrelbawlna lamah nasa takin awlsamna a thlen thu sawi a ni.
He system thar avang hian electric bill pawh hmuh that zawk beisei a nih bakah, online hmanga bill siam anih tak avang hian consumer-te pawhin electric bill a hun takah an dawng tawh ang a, bill hmuh loh leh hmuh tlai a awm tawh lo ang. System thar hman a nih tak avanga collection efficiency leh billing efficiency lama hmasawnna hian Mizoramin harsatna a tawh thin, Aggregate Technical & Commercial Loss (AT&C Loss) lamah nasa takin hma a sawn phah dawn a. Paper hmanga electric bill tam tak print ngai thin pumpelh a nih tawh dawn avangin sorkarin sum leh pai eng emaw zat a hum thei dawn niin an sawi.
Thutkhawmah hian department corporatize tura hmalakna peng pakhat atan, meter reader outsource tura hmalak mek chu chak zawka tihhlawhtlin dan tur sawiho niin, bial hlawm ang zel a then a, outsourcing kalpui dan tur ruahman a ni.
Tun hnaia power supply khaihlak thin chungchangte pawh sawiho niin, fur zualpui a reh chhoh tak avangin RDSS hnuaia hnathawh hrang hrangte ngawrh lehzuala kalpui tan a nih tak thu sawi a ni a. He RDSS hnathawh mek te hi mipui vantlang tana hmasawnna hnathawh kal mek a nih avangin load shedding kalpui fo thin chu mipuite pawhin hrethiam a, dawhthei taka tuar hram hram turin an ngen.