Russian President Vladimir Putin leh US President Donald Trump te Ukraine chungchanga Alaska-a an inbiak hma ni thumah European hruaitute chuan tharuma Ukrainian ramri rin that a theih loh tih an sawi.
Thuchhuah an siamah European hruaitute chuan ‘Ukraine mipuiten an hma hun thu titlu turin zalenna an nei ngei tur a ni’ tih an sawi.
‘Ram pakhat nihna’ chu zah tur a nih thu leh ‘khawvel ramri chu tharuma sawn luih tur a ni lo’ tih an sawi bawk.
Thuchhuahah hian ram 27 zinga 26-in an hming an ziak a, a ziak lo hi Hungarian hruaitu, Russia thian tha leh European Union-in Ukraine a thlawp tumna pawh dodal thintu, Viktor Orban-a chauh a ni.
Thuchhuah an siam hian European-ten Moscow-in Ukraine-a kut an thlakna hian Russia hnaih leh Soviet-in a awp laia thil thleng ang thleng lehin nakinah an tan hlauhawm a nih ve theih mai an hlau tih tilanga ngaih a ni.
Tun hnaiah Sweden leh Finland chuan Nato an zawm a, Baltic ramte pawhin hnaih hretin Poland chuan Russia ramri chu a hung vek.
European ramrite hi indona nasa tak avangin vawi tam tak an ramri rin that a ni tawh hlawm a, US-in Ukraine-a tih tumna ang hawia hma a lakna pawh an ngaihven hle a. Russia-in tharuma mi ram neihsak a tumna chu EU chuan a pawm thei lo a ni.
Trump-a hian inremna a awm theih nana Putin-a nen an inbiakna turah ‘ram bial thenkhat inthleng’ a ngai mai thei tih a sawi a, Russia hian Ukraine khawchhaka Donbas region pum bakah an luah lai, Crimea an chang zui thei a. Hmun thenkhat a luah mek, Kherson leh Zaporizhzhia region-te erawh a pek let rin a ni.
Thawhlehnia thuthar lakhawmtuten an kawmnaah Zelensky-a chuan Ukraine-in Donbas a chhuahsan dawn lo tih a sawi a. Kyiv hian 30% chuang awrh chauh a luah tawh a, Lukansk leh Donetsk region pahnih tiat vel a ni a. Zelensky-a hian an sipaiten an chhuahsan chuan Russia-in hmun dang an beihna kawng a inhawng thei dawn niin a sawi.
European hruaituten thuchhuah an siamah hian ‘Russia-in Ukraine a beih mek chuan European-te a nghawngin khawvel himna pawh a tichhia’ tih an tar lang a. ‘Rang taka muanna tluantling’ a awm a tul thu an sawi.
Ukraine chuan ‘mahni inven theihna’ a nei tih sawiin Kyiv chu sipaiah an pui zel dawn tih an sawi bawk.
Trump-a leh Putin-a hi Zirtawpniah an inbe tura ngaih a ni a. Hemi hma, Nilaini khan EU hruaituten American hruaitu hi an hmu bawk.