India chhim lamah internet hmanga pawikhawihna (cyber crime) a tam hle a, Telangana leh Karnataka chu Thawhlehnia National Crime Records Bureau (NCRB) chhinchhiahna tihchhuahah a thlen tamna ber a ni a. Puducherry chu union territory zinga a tamna ber a ni bawk.
NCRB-in kum 2022 chhunga thil thleng a chhinchhiahte kum chanve bia a tihchhuah tharah hian Telangana-ah hian cyber crime rate chu 40.3 a ni a, India ram pumah 4.8 chauh a nih laiin a sang hle.
NCRB hian cybercrime awm zat bi (rate) hi mihring cheng zat atanga chhutin mi nuai khat zel chu kum khat chhunga hetiang pawikhawih thleng zat hian a sem thin a ni.
Maharashtra-ah cyber crime rate hi 6.6 a ni akum 2022 chhung khan mi nuai 1,257-ah vawi 8,249 a thleng niin NCRB-in mid-year data a tihchhuahah hian tar lan a ni.
Andhra Pradesh-ah 4.4, Assam-ah 4.9, Uttar Pradesh leh Odisha-ah 4.3 leh Uttarakhand-ah 4.8 a ni.
State lian zingah West Bengal cyber crime tlemna niin 0.4 chauh a ni.
Union territory zingah Delhi chu cybercrime tamna niin 3.2 a ni a. Puducherry sang berin 3.9 a ni.
Kum 2025 kum chanve liam ta chhung khan ram khawpui bera chengte chuan internet-a sum kaihhnawiha sum an hloh chu Rs vaibelchhe 70.64 niin inbumna tum 184 a thleng niin Delhi Police chuan a chhinchhiah.
Kum 2024 khan Delhi-a chengte hian cybercrime vawi 1,591 thlengah Rs vaibelchhe Rs 817 an hloh va. Kum 2023 khan vawi 1,347 thlengin Rs vaibelchhe 183 hloh a ni.
Minister of State for Home Affairs Nityanand Rai chuan NCRB chhinchhiahna tihchhuah hmaa told Lok Sabha-a ziaka zawhna a chhannaah khawpui bera inbumna thleng thin ven nan Delhi Police chuan IFSO (Intelligence Fusion and Strategic Operations) siamin tun lai hmanraw tha leh software chak, chhui chhuak rang thei tur an chhawp tih a lo sawi tawh.
MoS Rai hian cyber crime a awma bawhzui a nih theih nan sorkar laipui chuan kawng hrang hranga hma a lak thu sawiin a hmalakna zingah Indian Cyber Crime Coordination Centre (I4C) din a ni a. National Cyber Crime Reporting Portal (NCRP) (https://cybercrime.gov.in) leh Citizen Financial Cyber Fraud Reporting & Management System (CFCFRMS) hawn niin Cyber Fraud Mitigation Centre (CFMC) din a ni bawk tih a sawi.
Sorkar laipui hian National Cyber Forensic Laboratory (Investigation) a din bakah Massive Open Online Courses (MOOC) platform, CyTrain portal an tih chu a duang chhuak bawk tih minister chuan a sawi.