Kerala Sports Minister V. Abdurahiman chuan kumin October emaw, November thlaah emaw Lionel Messi-a’n an state a tlawh dawn tih a sawi nasa a, a sawi ang erawh a thleng leh dawn lo.
Tun hnaiah khan Abdurahiman hian Messi chuan Kerala a tlawh leh dawn si lo tih a puang thar.
September, 2024 khan Abdurahiman-a hi Messi hmu turin Spain-ah a kal a, hetiang vel atan hian Kerala sawrkar chuan Rs. nuai 13 ngawt an seng tih tun hnaiah khan hriat chhuah a ni nghe nghe.
A hma kha chuan mipui pawisa an hman loh thu an sawi nasa a, sawrkar pawisa chu heti zat hi an lo hmang ngei a ni tih finfiah a ni a. Sports minister hi sports department secretary leh sports & youth affairs director ten an zui a ni.
Sports minister hian a hmain Argentina football team captain hi zin tura sawm turin pawisa pakhat mah sen a ngaih loh tur thu a sawi a. Tun hnaia an chhui chian leh hnuah Abdurahiman hian dawt a sawi a ni tih hi an finfiah ta a ni.
Messi hian kumin December thlaah India ram a rawn tlawh dawn a, a chah chhuaktu erawh mi dang daih an ni thung.
Argentine superstar hian Kolkata, Mumbai leh Delhi-te tlawh dawn niin an sawi a, Cricket Association of Bengal (CAB) erawh chuan Messi-a’n Eden Gardens a tlawh dawn tih thu an la dawn loh thu an sawi.
CAB President Snehasish Ganguly chuan, “Eden Gardens-ah Lionel Messi a lo kal dawn tih an sawi hi mak kan ti hle a, pangngai taka thutlukna siam a la awm lo a. He chanchin a darh vak mai hi chu a mak khawp mai,” a ti.
CAB hruaitu dang pakhat pawhin, “Army hnen atangin phalna kan lak phawt a ngai a, chu mi hnuah kan pawlin thutlukna kan siam a ngai dawn bawk a. Tun thlengin pangngai taka indawr a la awm rih lo,” a ti bawk.
India ram a tlawh hunah Inter Miami star Messi hi Mumbai khawpuiah Rohit Sharma leh Sachin Tendulkar te nen Mumbai khawpuia cricket khel tura ngaih a ni.