Hindi movie hlawhtling tak, tun hnaia tlangzarh leh hit em em mai ‘Saiyaara’ chu, bollywood-ah na na na chuan love story film siam hlawhtling thei em em Karan Johar meuh pawhin hahipin a fak nasa hle.
The Streaming Show season-3 a Suchin Mehrotra kawmnaah Karan chuan he fakna thu hi sawi chhuakin, a changtuten an hnehsawh bakah, hun kal tawha hindi movie hit tak tak, a bik takin love story a lo siam tawh laia boruak ang maiah khan a chen leh thu a sawi a ni.
‘Saiyaara’ kha ka en a, hun kaltawh tam tak ka ngaihtuah let a, kan vang lai nun leh movie siam tura ka that vang laite ka ngaihtuah thleng a, lung a tilengin, nunhlui min ngaihtir nasa hle, tun hnaia film chhuakah chuan min hneh ngawih ngawihtu awm chhun a ni, a ti.
An kawmnaah a sawichhuah mai bakah hian a Instagram lamah pawh he film fakna hi Karan chuan a ziak chhunzawm nasa hle a, a changtute pahnihin an hnehsawhzia leh a story awmsa an chang chhuak tha lutuk chu mak a tih hial zawk thu sawiin, fakna thu hrang hrang a dah zui bawk.
Karan Johar hi Bollywood-ah na na na chuan romantic lam lo siam nasa tawh leh hit tak tak lo siam tawh a ni a, ‘Kuch Kuch Hota Hai’ tih leh ‘Kabhi Khushi Kabhie Gham’ tihte phei chu vawiin thlenga mite en hlawh leh lung tilengtu a la ni hial a ni.
‘Saiyaara’ movie-ah hian Ahaan Panday leh Aneet Padda te chuan lead role play in, tlangzarh a nih atangin crore 500 chuang an lalut tawh a, kum 2025 chhunga hindi film sum lalut hnem ber pahnihna ni mekin, ‘Chhaava’ a la pha lo deuh a, an tlangzarhna a la rei lo bawk nen, a khum thuai a rinawm hle bawk.