Aizawl: Kum dang ang bawkin, rampum hmun dang rualin Mizoram hmun hrang hrangah pawh August 15 hian Independence Day vawi 79-na ropui takin lawm a ni leh dawn.
Mizoramah chuan he ni puala lawmna pui ber chu Lammualah zing dar 9-ah neih tan a ni ang a, Chief Minister Lalduhoma chu khuallian a ni dawn a. Hnam puanzar pawtparhin parade contingent te a endik ang a, an chibai buknate chhangletin march past neih zui a ni ang.
Chief minister-in Independence Day thuchah a sawi zawhah National leh State Award chi hrang hrangte a sem nghal ang a, Parade contigent-te hnenah lawmman a hlan ang.
Minister ten chan insemin district headquarters zawng zawngah an hmanpui ang a, Sub-Division (Civil) leh Block hrang hrangah sorkar anga lawmna inkhawm neih a ni ang.
Sorkar thuchhuahin a tar lan danin, Home Minister K. Sapdanga chuan Lunglei-ah a hmanpui dawn a, PWD Minister Vanlalhlana’n Kolasib-ah hmanpuiin, AH&Vety Minister C. Lalsawivunga’n Mamit-ah, EF&CC Minister Lalthansanga’n Champhai-ah, Education Minister Dr. Vanlalthlana’n Saitual-ah, Agriculture Minister P.C. Vanlalruata’n Khawzawl-ah, Health Minister Lalrinpuii’n Siaha-ah, P&E Minister F. Rodingliana’n Hnahthial-ah, FCS&CA Minister B. Lalchhanzova’n Serchhip-ah leh RD&D Minister Prof. Lalnilawma’n Lawngtlai-ah a hmanpui ang.
Mizoram sorkar chuan he hun pawimawh tak hmang tur leh a hmanna hmunahte tel theuh turin khua leh tui zawng zawng te a sawm a. A bik takin sorkar hnathawkte chu Independence Day lawmna programme-ah tel ngei tura hriattir an ni.
Lammuala Independence Day programme hman zawh a nih hnu, chhun dar 11-ah sawm bikte tan Governor’s ‘AT HOME’, Raj Bhawan-ah a awm leh dawn a ni.
Hetih rual hian, khua leh tui ten an chenna inah leh an hnathawhna in bakah sorkar pisa zawng zawngah India hnam puanzar tar turin sorkar chuan a ngen bawk.