Aizawl: Mizoram sorkar flagship programme ‘Bana Kaih scheme’ kaltlangin vawk vulha bul tan tum dilna 2,518 a awm.
Nimin khan Planning & Programme Implementation Committee Room-ah Mizoram State Policy Coordination Committee chu Bana Kiah Scheme hnuaia ran vulh thlangtute hman tur ‘Livestock Insurance’ kalpui dan tur ngaihtuahin an thukhawm a. AH&Vety Minister C. Lalsawivunga’n a tel pui.
MSPCC Vice Chairman KC Lalmalsawmzauva kaihhruai thutkhawmah hian Mizoram chhunga ran, a bikin vawk vulhtuten African Swine Fever natna leng thin avangin harsatna an tawh thin thu sawi a ni a. He natna laka ran an him theih nan AH&Vety department chuan theihtawpa hma an lak thu sawi a ni.
Mizoram sorkar flagship programme, Bana Kaih scheme kaltlangin vawk vulh dilna 2,518 a awm thu tar lan a ni a. Ran vulh tura hmalak tumte dilna leh ruahmanna kalpui tum dante uluk taka zirchian thin a nih thute, Bana Kaih scheme hnuaia hmalakpui tlak thlanchhuah ten thlamuang taka ran an vulh theih nan ‘Livestock Insurance’ tha neih a pawimawh thu sawi a ni.
He huna tar lan a nih danin, National Insuarance Co. Ltd. chuan kum 2024-25 chhung khan bawng 1,10,000 leh vawk 62,000 vel insurance an lo tih sak tawh a ni.