Voter roll Special Intensive Revision (SIR) kalpui sawiselna a nasat mek karah Congress hruaitu, Lok Sabha-a Leader of Opposition Rahul Gandhi-a chuan Pathianni khan ni 16 chhung awh tur Voter Adhikar Yatra chu Bihar khawthlang lama Rohtas district, Dehri-ah a tan a. Inthlan siam that nan leh SIR-a thil dik lote hai chhuahna atana a tih a ni.
Eptute hian SIR hmang hian electoral roll-a hming chiang maktaduai 6.5 chuang paih an ni tih sawiin vote tihchingpen tumna, hnam hnuaihnung, tlem zawk leh pema inhlawhfate hnawl tumna niin an sawi.
Yatra hi Dehri bula Saura Aerodrome Ground atanga bul tan niin September 1 thleng awh tur niin Bihar pum fan tum a ni a, Patna-a Gandhi Maidan-ah hun tawp hman a ni ang.
Thawhtanniah hian Aurangabad district tuamin Dev Road Amba-ah hun hman a ni ang a. Thawhlehniah Hanuman Mandir, Punama Wazirganj-ah Gaya leh Nawada bituma hun hman a ni dawn a. Nilainiah chawlh hman a ni ang a, tual chhung mite a kawm dawn.
A ni nga na, Ningani hian Gandhi-a hian Teen Mohani Durga Mandir, Sheikhpura thlengin Lakhisarai-ah hun a hmang ang a. Zirtawpniah Chandan Bagh Chowk, Munger-ah Bhagalpur division-a mipuite pualin hun hman a ni ang a. Inrinniah Bihar hmarchhak pualin Kursela Chowk, Barari, Katihar-ah hun hman a ni ang.
Pathianniah Khushkibag atangin Katihar leh Purnia thlengin Purnia district tuam a ni ang a, August 25-ah chawlh a ni ang.
August 26-ah Yatra hian Madhubani division huam chhunga Hussain Chowk, Supaul thlengin eptu hruaitu hian a tukah Gangwara Mahaveer Sthan, Darbhanga-ah tual chhung mite a kawm ang a. August 28-ah Riga Road, Sitamarhi district hrul zawhin Hariwatika Gandhi Chowk, Bettiah a thleng ang a, August 29-ah West Champaran a thleng ang.
August 30-ah Saran district chhung, Ekma Chowk, Chapra thlengin Arrah-ah a tawp ang a. August 31 chu hun tawp ni atana inbuatsaih nan an chawl ang a. September 1-ah Voter Adhikar Rally hi khar a ni ang a, INDIA hruaitute pawh an tel ang.
“He Yatra hian ram chhunga inthlan politics-ah thil thar a thlen dawn a ni,” tiin Congress hruaitu hlun, Kishore Kumar Jha chuan a sawi a, langtlang inthlanna a awm theih nana hmalakna a nih thu a sawi.
“INDIA tangrual hi 2024 Lok Sabha inthlanah khan Bihar-ah hian Gandhi-a’n Bharat Jodo Nyay Yatra-a a tlawh hnuah bial zawng zawng deuhthaw kan la a. A pumah bial 234 kan la a, NDA-in 292 an la a, he yatra hian boruak lian tak a nei a, Bihar-a thalai 40% chuang chuan NDA sorkarin a ngaihthah niin an ngai a ni,” a ti.
Gandhi-a hian yatra a neih tur hi ‘Bihar leilunga vote ruk beihna leh mipui rorelna humna tur’ tiin a sawi a. RJD hruaitu Tejashwi Yadav, left party-te atangin Dipankar Bhattacharya, Samajwadi Party hruaitu Akhilesh Yadav leh INDIA hruaitu dang, Congress President Mallikarjun Kharge te pawhin an tawiawm ang.
Kawng zawh hian Bihar-a district 20 chuanga km 1,300 chuang a zawh dawn a. A karah vantlang inkhawm, vantlang nena inkawm a awm ang a. A kalnaah vote nei lem te, dik lo taka SIR kalpui a nih dante a aupui ang a. A auhla pui berah ‘Tunah hian vote ruk hnehna atan’ tih a ni ang.
Hetih lai hian Bihar-a NDA thawhpui sorkar Deputy Chief Minister Samrat Choudhary-a chuan yatra chu inthlan hmaa mipui hruai hawi thei niin a sawi a. Congress leh an thawhpuite chuan Election Commission of India (ECI) chu an dah hniam niin a sawi a, SIR chu langtlang taka tih a nih thu leh eptute thil tih dan chu inthlan huna an chak loh chhuanlam tur an puanna niin a sawi.
Deputy chief minister hian Bihar mipuiin Chief Minister Nitish Kumar-a kaihhruai chu an la ringtawk tih a sawi bawk.