Mi hriat leh dahsan nih tawh chuan mawhphurhna rit takin a zui nghal thin. An mahni chang a, veh reng thintute an tam vangin an mimal nunah pawh fuh lo leh dik tawk lo haichhuah a remchang a, thawpik mai bakah harsatna neuh neuhin a umzui duh hle. Beisei leh tum loh thil a thlen hian a nghawng a na lehzual. Sorkar ang pawha buaipui tham an tling. Selena Gomez, Katy Pery leh Brad Pitt te hi China rama luh phalsak an ni lova, an tan kawng a inhawng lo.
- Selena Gomez
Khawvelpumah fan maktaduai tam tak nei mah se, China-ah a luh khap bur a ni. 2014 khan Dalai Lama nena an thlalak dunna pic chu a darh hluai mai a, he an inhmuhna hi Chinese sorkar tan pawm zam theih a ni lova, enliam theih a ni bawk hek lo.
Tibet la hrang tur a, China laka hel mek Dalai Lama leh Lose you to love me singer thlalak a darh veleh ram-chhunga show a neih tur zawng zawng chawpchilh taka cancel sak vek niin, hun lo la awm turah an mikhual dawn lo tih a chiang nghal.
- Katy Perry
Kum 2015 khan China sorkar leh mipuite chuan nasa takin an sawisel a, a lakah an lungawi lo. Concert pakhatah Katy hian Taiwanese National Flag chuanna lukhum a khum a, dress-ah langsar takin a pholang bawk.
Nihawi (sunflower) leh Taiwanse cap dress hi China tan hmuh hrehawm tak a tling. Mahnia ro inrel hrang mah ni se, China hian a ram bungkhatah ngaiin, engtikah emaw chuan tharum hmang pawhin a rûn ang, a lo tih tawh avangin boruak a rit hle reng a ni.
Chinese mipuite te ngei pawhin a inthuam dan hi an ei lova, hei vang hian sorkar ngaihdan tawmpuiin, an rama a lo luh theih loh chu an duhthusam a ni ta, dam-chhunga atan an banned hmiah mai a ni.
- Brad Pitt
Lemchan khawvela milar hi 1996 a tihchhuah ‘Seven Years In Tibet’ film-ah inlanin, Austrian tlâng lawn-mi lemah a chang. |awngkam leh aw phawiah pawh Austrian pachal dik tak a nih theih-na turin a thawkrim hle. Mahse, midang an a tum luat-ah sawi-sel a tâwk a, dawnsawn dan a inang lo nuai.
China sorkar mit a tikham hle a, political issue lian tak a nih vang leh a tha lam hawi zawnga Dalai Lama tarlan a nih bawk avangin an pawm thei lo. Chinese sipaite lehzel fuh lo taka tarlan a ni chu a an en liam thei reng reng lo.
Brad Pitt leh he film-a director Jean-Jacques Annaud chu an rama an luh engtikawngmahin a rem ti ta lo.