Kumin fur zet chu kan ram chak lakna kawngpui buaiin kan buai a ni ber mai a. Transporters lam lungawi lo nuar thawm leh nitin khawsakna mamawh ei leh in turah kan mangang a. Aizawlah bawnghnute lam chi lei tur a awm lova. Thingpuidawr pawhin thingpui an siam thei lo hman a. Tel a awm lova. Engkim mai kan inchuh tan a ni ber mai. Awm lo zinga mipui manganna ber erawh nidang ang bawkin petrol leh diesel awm lo kha a ni. A tawpah mipui thinur tur ngai ngam lovin kan sawrkarin thapui a thawh a. Tunah chuan tlem tlemin harsatna zualpui a kiang rih.
Heng thil thlengah hian mipui lamin PWD minister an puh a. A chhe thei ang berin an chhuah a. Politics pawh khel leh tlak tawh lo hiala sawi tawk an awm bawk. Heti tak maia PWD minister kan dem lai hian kan sawrkar lah chuan a thlavang an hauh miah lova. Thuchhuah engmah an siam hek lo. A tawpah PWD minister chu chak lo an tive hle a ni tih lanna turin minister leh MLA rualin kawngpui chhia chu an han vilpui leh lawi si. Kan PWD minister hi an bawl nge, an khawngaih? An tiduhdah hle mai.
Kan PWD minister hi ram hmangaihtu, MLA ah pawh vawithum lai thlan tlin tawh a ni a. Tunah pawh kan politician senior ber zinga mi a ni tawh a. Engatinge heti tak maia an mualpho tir mai chu le.
Kawngchhia hi a siam hun laia siam loh vang a ni ngei a. A siam lotu pawh PWD minister hi a ni. Mahse, engvanga siam lo nge a nih ang. Siam ngei pawh a duh tih hai rual a ni lova. A siam hun a hre lo pawh a ni lo. A hun laia finance lamin pawisa an pekchhuah duh loh miau chuan a tan chet lak ngaihna a awm lo a ni.
Dik tak chuan kan sawrkar lai party hi pawl pathum ZNP, Mipui pawl leh Peoples Conference inchhun finin an siam a ni a. A lu ber ZNP in a chang a. Chief minister nihna a chang a. A dawt leh chu Mipui pawl an tih mai kha a ni a. Hemi aiawha hotu ber chuan home minister nihna a chang bawk a. A pathumna chu PC lama hotu berin PWD changin tunah hian sawp mualpho a ni chho ta ni berin a lang. A hun laiin finance changtu CM in pawisa pe se tuna kan kawngpui chhe harsatna hi a thleng lovang a. Kan PWD minister a mualpho hek lovang. Chuvangin he kawngchhia a mualphona nasa tak hi politics bawlhhlawh tak phiarrukna ang pawhin miin ngai se a dik thei tho ang. A tak taka mualpho ber erawh Pu Vanlalhlana a ni a. Halralna meipuiah kan CM hian a nawrlut ta ani pawh ti ila a sual tam awm love. Politics bawlhhlawh phiarrukna zam chiai avanga mipui tawrhna hi mipuiten i hmu hmaih lovang u.