Khabib Nurmagomedov chuan a hmelma lian, Conor McGregor chu a nun dan phung thlak danglam tawh tura a beisei thu a sawi.
Mixed martial arts fighter chawl tawh pahnihte inkar boruak hi a sosang thin hle a. Kum 36 mi, Khabib hian McGregor chu kum 2018 khan UFC huanga insual sawi hlawh berah rear-naked choke hmangin a hneh a, an insual zawhah hian Octagon pawnah a zuang chhuak a, lehlam pawl awmna lamah zuang thlain an intibuai zui ta chiam a. Kum 2020 khan hneh loh nei loin UFC chu a chawlhsan a ni.
McGregor chuan Khabib a hneh loh hnuah vawi thum octagon a luhchilh leh a, vawi khat chakin vawi hnih a chak lo a. He mi hnuah hian buaina neuh neuh a nei fo a, kum 2024 khan mipat hmeichhiatna chungchangah thubuai an siamsak nghe nghe.
Hetiang boruakin a bawh buai mek karah hian Khabib chuan McGregor-a tan nunphung thlak danglamna khua a la tlai lo tih a sawi a, a inthlak danglam theih pawh a beisei tih a sawi bawk.
“Tuna a hun tawn hi hremna chu a ni ngei a; mahse, pathian hian inlamletna hun hi min siamsak vek thin a. Chutiang chiah chuan Conor pawh hian insiam thatna hun tha a neiin ka ring a, a nun dan hi a thlak ka beisei,” a ti.
“Eng vanga hetiang hi sawi nge ka nih in tih chuan, amah ber hi a inthlak danglam phawt chuan mi dangte nun tam tak a thlak danglam dawn a. Mi tam takin an thatpui thei dawn a ni,” a ti bawk.