Mizoram sorkarin mipui health care tia an sawi, Mizoram Universal Health Care Scheme (MUHCS) chungchanga Independence Day-a Chief Minister Lalduhoma leh Health Minister Lalrinpuii-te thusawi a inang lo.
Sorkar thuchhuaha tar lan danin August 15-a Aizawl Lammualah India ramin zalenna a hmuh champha vawi 79-na lawmnaah khuallian, chief minister chuan hnam puanzar pawt pharhin parade contingent-te chibai bukna a chhang let a. Hemi hnua thu a sawiah, health care bill tang zawng zawng rulh zawh vek a nih thu a sawi a. MUHCS thar hnuaiah state chhungah a thlawnin damlo 25,588 enkawl an ni tawh a. Rs nuai 3,396 chuang pek chhuak a ni tawh tih a sawi.
Hetih lai hian Siaha-a Independence Day lawmna, SDFA Ground Meisatla-ah buatsaihah, khuallian health minister chuan damloh nikhuaah puk chawp leh ba thlaa damdawi in atanga inkhul chhuak thinte kha tunah chuan pawisa chawi ngai miah loa an inenkawl theih dan tur – Mipui Healthcare (MUHCS) an duang chhuak a. Hei hi a hlawkpui ber chu mipuite an nih thu a sawi.
Health minister chuan kumin April 1-a MUHCS hman tan atangin damlo mi 25,287 te enkawlna atan sorkar chuan Rs vaibelchhe 33.12 lai a seng tawh tih a sawi thung.