Saikhawthlir ram chhung, Diltlang Lui zaua rubber chingtute rubber phun sa leh la phun lohte chu Assam Police leh Assam Forest lam miin Inrinni khan an tichhia.
The Zozam Times -in Saikhawthlir atanga thu a dawn danin Inrinni chawhnu dar 2 vel khan Saikhawthlir ram chhung, Diltlang Lui zaua Land Resources, Soil & Water Conservation Department-in a kalpui mek, Chief Minister Rubber Mission hnuaia rubber chingtute rubber phun sa leh la phun loh tiak eng emaw zat, Assam Police mi pahnih leh Assam Forest lam mi pariatte chuan an tichhia a. Rubber phuna hnathawka awm mekte hmanruate pawh chhuhsakin chawhnu dar 2:30 vel khan Assam-ah an let leh a ni.
Assam Police leh Assam Forest chet lak dan hi nimin khan hriattir nghal niin, nimin vek khan Kawrthah SDO (Civil) leh Mamit SDPO te bakah Saikhawthlir khawtlang hruaituten a hmunah an kal a. Mizoram leh Assam aiawh hotute leh Saikhawthlir khawtlang hruaitute an inbe nghal bawk.
Vawiinah Bairabi-ah state pahnihte higher authority-te an inbe dawn nia thudawn a ni.
August 5, 2025 khan Assam Police leh Assam Forest te hi Diltlang Lui zau hmunah tho hian kal tawhin rubber phun mekte an en thlithlai tawh a. Hemi tum hian thlate lain, an let leh niin thudawnna chuan a sawi bawk.
Tun hnaiah Chuhvela IR-te awmna, Branch Out Post (BOP)-ah duty an indaih lo hle a. Dam lohna avanga chawlh la an awm nual avangin police duty tur an tlem hle a, police dah belh a tul hle niin a sawi bawk.