Ei zawn nana ball pet hmangho inhlawm khawmna pawl lian, Fédération Internationale des Associations de Footballeurs Professionnels (FIFPro) chuan Indian Super League (ISL) mumal lo lutuk vanga club thenkhatin an player-te contract an tihtawp chungchangah player-te chhanin FIFA hnenah club an hek.
Khawvela professional footballer 65,000 vel zet inhlawm khawmna, FIFPro hian ISL club thenkhatin an player-te contract an titawp chu dan bawhchhiatna a ni tih sawiin, khawvela football pawl lian ber, FIFA hnenah an zualko.
FIFPro hian FIA hnenah e-mail an thawn a, ISL club-ho chet dan chungchangah hian inrawlha hma la turin an phut tih an sawi.
Player-ho contract tihtawp a nih hnuah hian Football Players Association of India (FPAI) chuan FIFPro hnenah hian an lungawi loh thu an thlen a. ISL 2025-26 chinchang tihchian a nih hmaa hetianga club thenkhatin player-te hlawh pe fel loa an contract an titawp ringawt hi thil dik lo a ni tiin thuneitute hnenah hian an thlen a ni.
FIFPro hian an e-mail thawnah hian, “Vanduaithlak takin Indian Super League kal zel dan turah ruahmanna mumal a la awm lo a, sum dinhmun pawh a chiang lo hle a. Hei vang hian a kaihhnawih club leh mihring tan awm thiam a harsa a, player-te tan phei chuan ngaihtuahna sen thiam a har hle dawn a ni,” an ti.
“Player eng emaw zat chuan FIFPro min rawn pan a, an harsatna an rawn thlen a. ISL club thenkhatin an player-te contract tawp hun hmaa an titawp thut mai chu hriat thiam harsa an tih thu an sawi a. Hetianga dan bawhchhiaa player-te dikna an palzut hi a fel lo hle a, ISL chin tur hriat theih a ni lo bawk nen, player-te tan harsatna lian tak an siamsak mek a. Rilru buai takin an awm a, an mang a ang tak meuh meuh a, an innghahna, an ei zawnna leh an vanglai hunin a tuar mek a ni,” an ti bawk.
Bengaluru FC chuan first team player-te leh thawktute hlawh an pe zui tawh lo a, Odisha FC pawhin tihluihnain player leh thawktute hlawh an titawp vek bawk a, Chennaiyin FC pawhin hetiang hian hma an lo la tawh bawk a ni.
FIFA hnena email an thawnah FIFPro chuan, “He mi chungchang hi rawn ching fel thei ula, hma rawn la thei ula kan lawm hle ang. FIFA chuan hetiang thil thleng hi an ngaihthah mai mai thei lo a ni,” an ti.