Aizawl: North East Students Organisation (NESO) huaihawtin nimin khan MZP General Headquarters chuan Vanapa Hall kawtah hmarchhak biala dan lova ram dang mi lut thin an duh lohna lantirin an pungkhawm.
MZP huaihawt ‘Sit-in Protest against illegal immigration in North East States’ hi hmarchhak state dang ruala neih niin, Aizawla hun hmanah MZP President H. Lalthianghlima chhuan hmarchhak state-ah dan lova raltlan, Bangladesh mi an tam avangin buaina a tam em em a, hei hian state tin a tibuai mek a, Assam chu buai ber an nih thu sawiin, Mizoram pawh an harh thaa tul tih a sawi a. “Assam atanga illegal immigrant an hnawhchuahte hian Mizoram bak pan tur an nei lo. Kan sorkar pawhin ruahmanna khauh tak siam se, ramri hi kan ven uluk a ngai hle a ni,” a ti.
NESO Vice President Ricky Lalbiakmawia pawhin thu sawiin, kum tam tak kal ta atangin hmarchhak bial te hian dan lova lo pem lutte thununna leh um zuina tha tak a neih loh avangin harsatna a lo tawk nasa tawh tih a sawi a. kum 1947-a India in Independence a hmuh hnu lawk atangin he buaina hi a intan tawh a, hei hian state tinte khawtlang nun leh hnam ziarang te, dan lova pem lutte avanga harsatna leh politics thila ngialnghehna tichhetu berah a tang ta tih a sawi.
NESO Coordination H. Hrangkunga pawhin thu a sawi a. Hmarchhak state hrang hranga zirlai pawlte hian nimin khan a rualin an state chief minister hnenah memorandum an thehlut theuh a ni.