Aizawl: Lai Autonomous District Council (LADC)-a Chief Executive Member atan N.Zangura chu nimin khan Additional DC, Lawngtlai David Lalrinawma’n LADC Hall, Lawngtlaiah rinawmna thu tiamtirin a la lut.
CEM lakluhna inkhawm, LADC-a Exeutive Secretary K. Lalthanzara kaihhruaiah hian CEM thar, M. Kawnpui bialtu N. Zangura chuan 11th LADC term-ah hun harsa tak tak an tawk thin tih sawiin, hun pawimawhah ram hruai hna thawk tura a chunga mawhphurhna tla chu lawmawm a tihrualin, amah chauh chuan hmachhawn ngaihna a awmlo tih a sawi a. LADC-a a member-puite, hnathawktute, kohhran leh khawtlang hruaitute bakah ram mipuite thawhpuiah sawmin, LADC tan ngaihtuahna seng thara, ngaihpawimawh an neihte a hnenah thlen a, finchhuah thin turin a sawm.
United Democratic Alliance (UDA) hruaitu N. Zangura chuan a chanpual bak engmah a beisei loh tur thu sawiin, pawisa chu dik taka hman a nih chuan ram mipuiten eng emaw zawng talin an tangkaipui ngei a beisei thu a sawi a; LADC hnuaia thawkte leh a sorkara a thawhpuite pawh sum thianghlimlo laka inthiarfihlim ngam turin a chah.
N. Zangura hian a thawhpui tur Executive Member atan mi pakua a ruat nghal.
Tun dinhmunah LADC-ah hian Elected Member 25-ah MNF 11, BJP pahnih leh pawn lam atanga thlawptu Congress member pakhat nen United Democratic Alliance (UDA) chuan member 14 neiin, ZPM-in Member 11 an nei mek.
Nimina CEM atan lak luh tak N. Zangura hi BJP MDC niin, tun LADC term kal laiah hian MNF, Congress, ZPM leh BJP ten CEM dinhmun an luah tawh a ni.