Aizawl: Mizorama Health ATM hmasa ber Civil Hospital, Lunglei leh Primary Health Centre (PHC), Lungsena khawl bun thar chu nimin khan Health Minister Lalrinpuii’n a hawng.
Lunglei District Administration hma laknaa ‘Healthy Lunglei Initiative’ khawl bun thar, Health ATM hawnna inkhawm hi Civil Hospital, Lunglei Seminar Hall-a neih a ni a. Health Minister Lalrinpuii chuan Mizorama Health ATM hmasa ber hawngtu a ni chu vannei a intih thu sawiin, Lunglei district mai ni lo, state pum pui tan he hun hi hun ropui leh chhinchhiah tlak tak a nih thu a sawi.
Health Minister chuan Health ATM chu mipuiin a rang taka mahni hriselna dinhmun — BP, zunthlum, taksa inphut dan (BMI), taksaa boruak thianghlim oxygen awm zat, leh thil dang tam tak hriat nan a hman theih dawn tiin, a khawlte chu IoT (Internet of Things) technology nena thuam a nih avangin, result a pek chhuah zung zung bakah, a hmangtute hriselna dinhmun chu lo chhinchhiahin, digital health record a vawng tha nghal zel dawn a, inentir tura damdawi in lian zawk pan nana sum, hun leh tha tam tak sen ngai thin chu eng emaw chen a chhawk zangkhai thei dawn tih a sawi.
Health ATM-ah hian test chi hrang hrang 35 vel tih theihin, taksa nihphung tlangpui, zunthlum, thisensang, lung lam, beng, mit leh rilru lam dinhmun te a endik theih dawn a. Hriselna atana ei leh in fimkhur dan tur thurawn te pawh a awm bawk a. Test hrang hrang hi a thlawn veka tih theih niin, darkar chanve tling lova tih zawh vek theih a nih bakah, test result hi mahni phone-ah a dawn nghal theih bawk.