Aizawl: MNF President Zoramthanga chuan MNF sorkarin hmasawnna hna a thawh nasatzia hre chiangtu chu Zoram mipuite an ni tih a sawi.
Thawhtannia Mizo Hnam Run chhung inkhawmah MNF president chuan, MNF sulhnute chu sawi nep theih a ni lo tih sawiin, “Record awm vek leh a taka hmuh theih vek a ni. MNF-in development a din zingah sipai ramluah chhuhsak a, MINECO an din leh Lunglei World Bank road ringawt pawh hi a nep lohzia mipuiin an hria,” a ti.
Chief minister hlui chuan, “Kum 1998-a MNF-in sorkarna a siam khan Mizoram sorkar sum dinhmun kha a chhe tak zet a. Leiba tam tham takin min delh a ni. Chu chu kan sawi ni lovin Congress sorkara Finance Minister ngeiin sorkar sum chhiatzia hi a sawi a ni. Delhi-a finance ministry nen kan han en a, ‘Peace Bonus’ tia hming phuahin Mizoram chhanchhuahna tur sum kan dil ta a. India rama ram buai ber ni thin kha a ralmuang berah kan tang ta a, chumi pual chuan peace bonus chu kan dil ta a ni,” a ti.
Zoramthanga chuan ‘Peace Bonus’ kha Rs vbc 175 an dil a, an dil aia tam daih, an ba rulhna atana daih tur law law Rs vbc 182.45 a pe ta tih sawiin, “Hetih laia kan plan budget zatve thuak min pe kha a ropui tak zet a ni,” a ti a. Peace Bonus sawi nep tumna awm thin leh MNF hnathawh ropui tak takte chu sawinep tum awm thin mah se, an sawi ve zel dawn a. MNF sorkar-in hmasawnna hna a thawh nasatzia kha a hrechiangtute chu Zoram mipuite an ni tih a sawi bawk.