Max Verstappen chuan season tharah pawh Red Bull-ah a la awm zui tur thu a sawi a, Mercedes a zawm dawn nia thu thang chu a dik lo a ni tih a puang.
Vawi li ngawt Formula One world champion lo ni tawh Verstappen chuan, “Thu thang hi tihtawp a hun tawhin ka hria a, kei chuan ka awmna ngaia ka la awm zui turzia hi ka chiang hle a ni,” a ti.
“Kan team pawhin thu dang kan nei lem lo a, châm zui tura dah chian sa kha ka ni hrim hrim a. Kan car chungchang te, hma kan sawn theih dan tur te kan sawi nasa thei hle a, kan sawi tawp thei lo a ni ber,” a ti bawk.
Formula One chuan kum thar atangin engine thar an hmang dawn a, Mercedes chu a langsar ber tura ngaih niin, Red Bull pawhin Honda nen an inthen hnuah anmahni pualin power unit an siam ve bawk a ni.
Champion lai, kum 27 mi, Verstappen hi season kal mekah intlansiak vawi 13 neih tawhah vawi hnih chu chak ber a ni ve a, a pum puiah pathumna a ni mek a. Red Bull-ah hian kum 2028 thleng contract a la nei a ni.