TV show vela kan hmuh thin, Lalmalsawmi Hlondo (Mali Hlondo) chu nimin tuk dar 7 khan a thi a, kum 41 a ni.
Mali Hlondo hi tun hma deuh khan TV show hrang hrangah host niin kan hmu thin a, TV host/presenter a nih bakah radio FM ah pawh RJ a ni tawh thin.
Tun hnaiah erawh TV show lamah hian a inlan ta meuh lo a, a inlan hnuhnung ber tura ngaih hi kum 2017-a show ngaihhlut hlawh tak, ‘U Got Talent’ show a kaihhruai kha a ni ta awm e. He show-ah hian judge Henry C Lalrawnkima, Elijah Lalrinawma, Angela Khuma leh Alan Rinawma (L) te nen an inlan a ni.
Mali Hlondo hian TV lamah chuan Skylinks-ah bul tanin, heta tang hian hriat pawh a hlawh hle. ZONET leh DDK-ah mi kawmin programme a buatsaih thin bawk.
Mali Hlondo hi nimin vek chhun dar 1 khan Venghluia an chenna inah vui a ni.