Aizawl: Mizoram Board of School Education buatsaih ‘UPSC Grooming Scheme’ chu nimin khan School Education Minister Dr. Vanlalthlana’n a tlangzarh.
MBSE Conference Hall-a tlangzarh inkhawmah Dr Vanlalthlana chuan zirlai naupang an nih lai atanga Civil Services atana inpuahchahna kalpui hi sorkarna fawng an chelh hma atanga an vei tawh leh tihhlawhtlin an intiam tawhna a nih thu sawiin, a hlawhtlinna an hmu ta chu lawmawm a tih thu a sawi.
Education Minister chuan UPSC Civil Services exam-ah hlawhtlinna thangkhatlian dawn an chang tawh lo chu mi zawng zawngin an vei a, a chhan tur awm chi hrang hrangte pawh an inrinsiak thin a. Zirlai naupang an nih atanga bul tanpui a tula an hriat vangin hma an la rawih dawn a, tun hi pilot project a nih avangin Aizawla mi ngei an ti phawt a, kum tina kalpui an tum avangin an huang pawh zauh chhoh zel an inbeisei tih a sawi.
He scheme hi a hming tak chu ‘A Scheme for Cultivating Early Foundations: Preparing Students for the UPSC Examinations from a Young Age’ tih a ni a. UPSC Civil Service exam-a Mizote tling an awm chhoh zel nan tun atanga hemi kawnga naupangte chher hriamna atan sorkarin a duan a ni a. MBSE chu a scheme duang tur leh hemi kawnga hma la chhunzawm tura tih a ni.
He scheme hi HSLC exam pass zo hlim naupang titha zualte tana buatsaih a ni a, Civil Service exam tum, naupang thlanchhuah te chu an kal zel dan tur sorkarin a ngaihtuahsak dawn a ni.