All India Football Federation (AIFF) chuan Indian Super League (ISL) chungchang chu Thawhtanni khan Supreme Court hnenah a thlen.
Supreme Court hi AIFF kalphung duangtu an ni a, ISL chungchanga buaina awm mek pawh hi a ngaihtuah nghal tura ngaih a ni.
India rama football inelna lian ber tia sawi mek, ISL chungchangah thu chiang a awm hleithei lo a, hei vang hian Indian footballer bakah ram pawn atanga lutte dinhmun a chian theih loh phah.
Football Sports Development Limited (FSDL) leh AIFF inkara inremna thuthlung an ziah, Masters Rights Agreement (MRA) chu an la ziah belh leh loh avangin inelna kalpui tur chin tur hi a sawi theih loh phah a. Hetianga ISL neih a nih dawn leh dawn loh a chian theih loh avang hian club thenkhat chuan an player-te hlawh bakah thawktute hlawh pek zui an tum tawh lo a ni.
AIFF chuan, “All India Football Federation leh Indian Super League club-te chu August 14, 2025 khan an inbia a, an harsatna te, 2025-26 ISL season chungchang te chu Supreme Court hnenah an thlen dawn a ni,” tiin a lo sawi tawh a ni.
Supreme Court hian ziaka dilna theh luh an phut a nih chuan AIFF hian a rang lama theh luh an inhuam thu an sawi a. “Thutlukna siam vat pawimawh kan ti a, roreltute thutlukna hriat theih vat kan duh hle a. Player te, club te leh India ram football dinhmun hi chin fel vat a pawimawh a ni,” an ti a ni.
Kar hmasaah khan ISL club 11-te chuan AIFF hnenah India ram football dinhmun chu ching fel thuai turin an ngen a, AIFF-in hma an la lo a nih chuan court hnena kal hi an rel a ni.