Hamas chuan palai hna thawktuten Gaza-a Israel nen an inkahhaina tura rawtna thar ber leh mi hren an chhuahna tur chu an pawm niin Palestinian hel pawla hotu lianten an sawi.
June thlaa US palai, Steve Witkoff-a’n a rawt angin Egypt leh Qatar ramten thawh hniha inkahhai kalpuina tura ruahman hi an duang a ni.
Rawtnaah chuan ni 60 inkahhai chhungin Hamas hian Israeli an la hren mek 50 zinga a zahve chu thawh hnihin an chhuah ang a, an mi hren mek zinga 20 hi an la dam nia hriat a ni a. Hetih chhung hian inkahhai hlen a awm theihna tura indawr zui a ni ang.
Israel-in engtin nge a ngaih tih a la chiang lo va, a hma erawh kha chuan Prime Minister Benjamin Netanyahu-a pisa chuan inkahhai chu ‘mi hrente vawi khata chhuah vek’ an nih dawn chauhvin an pawm dawn tih a lo sawi tawh.
Hamas-in inkahhai ruahmanna thar an pawm tih thu a darh hnu lawka Netanyahu-a’n video a tihchhuahah chuan rawtna chungchang tlang taka sawi chiah lovin hel pawl hian ‘nasa taka nawrna’ an tawng niin a sawi.
Kartawpah hian a cabinet chuan Israeli sipaiten Gaza City luah an tumna ruahmanna an pawm rin a ni a, luah an tum avanga nasa taka an beih mek avangin Palestinian sang tam tak an tlanchhe mek.
Thla hmasaa inkahhai a awm theih nana an indawrna a tlawlh hnuah prime minister hian Israel chuan huam zau zawka beiin Gaza hneh vek an tum tih a puang a. An beih tur zingah mi cheng maktaduai hnihten tawm him nana an hman, an tlan khawmna hmun pawh a tel.
Pathianni khan Tel Aviv-ah Israeli sang tel pungkhawmin an sorkar chu Hamas nen inkahhai puanga mi hrente hruai haw tur leh indona titawp turin an nawr ve mek bawk.
Netanyahu-a chuan heng nawrtute hian Hamas tanhmun an titha mai mai niin a sawi a. Indo chu mi hrente vawi khata an chhuah leh hel pawlin an ralthuam an dah chauhvin a tawp dawn tih a sawi.
Gaza chu sipai awm lohna, a himna zawng zawng Israeli-ten an thununa Hamas emaw, Palestinian Authority emaw nena inkungkaihna nei loten ro an rel a duh bawk.
Hamas ve thung hian an mi hren mekte chu Israeli lung ina Palestinian tang mekte thleng nan bakah indo titawpa Gaza atanga Israeli sipaite an chhuah vek theihna tura kar nan an hmang a. An pawl chuan Palestinian-te tana ram a din hma chu ralthuam tun an tum lo.
Israeli sipaite hian October 7, 2023-a Hamas kaihhruai Israel chhim lam beia mi 1,200 chuang an thah leh hren tura mi 251 an hruai phuba lak nan Gaza hi an bei.
Hemi hnu atang hian Gaza-ah mi 62,004 an thi tawh niin Hamas health ministry chuan a sawi.