Lai Autonomous District Council (LADC)-a Chairman T. Zakunga leh Deputy Chairman C. Biakthansangi ten nimin khan larsap hnenah bânna an theh lut a. LADC-a CEM-in thlawptu a neih dan fiah theih a ni lo.
Thawhtannia Chief Executive Member atan lak luh tak, United Democratic Alliance hruaitu, N. Zangura chuan thlawptu a neih dan fiah turin nimin chhun dar 12-a tan turin LADC Chairman T. Zakunga chuan Thawhtanni tlai khan LADC Emergency Session a ko va, Session tan hma hian ZPM sorkar tlu taa chairman leh deputy chairman ten bânna an theh luh avangin Session kaihhruai tur an awm loh vangin N. Zangura dinhmun pawh fiah theih a ni lo.
Session Hall-ah member thenkhat chu lut hman mah se, Chairman leh Deputy Chairman an bang tih an hriat hnuah Session Hall hi an chhuahsan nghal.
T. Zakunga hi kumin March 26 khan LADC chairman atan thlan a ni a, C. Biakthansangi hi April 22, 2025 khan deputy chairman atan thlan a ni.
LADC-a UDA sorkar piang mekah, Chairman leh Deputy Chairman an ban avang hian UDA lam chuan larsap hnenah protem chairman ruatsak tura ngen thuai an tum a, protem chairman kaihhruaina hnuaiah chairman thar thlanna neih a la ni ang.