Nilaini atanga khelh tan tur, South Asian Football Federation (SAFF) U-17 Women’s Championship 2025-a match offical turin Mizo nula, K.Lalhruaizeli (Nupuii) chuan Thawhlehni khan inelna neihna hmun tur hi a thleng.
Changlimithang Stadium, Thimphu, Bhutan-a inelna neih turah hian ITI Veng, Aizawl nula, Nupuii hi assistant referee tura ruat zingah a tel a, Mizo zinga ram leh ram inkhel enkawltu zinga tel hmasa ber a ni dawn.
India atang hian Nupuii bakah hian match commissioner leh referee tur pakhat ve ve ruat an ni a. Nupuii hi asst referee tura koh niin referee tur hi Netu Rani, Delhi a ni thung.
Nupuii hi amah pawh footballer niin Mizoram aiawh pawhin a lo feh chhuak tawh thin a. Kum 2022 khan national referee-ah a tling a, Asian Football Federation (AFC) Referee C Diploma a nei zui a, national referee a ni mek.
Mizo zingah national referee hian mipa panga leh hmeichhia pali an tling tawh a, tunah hian mipa pahnih leh hmeichhe pali hian an la chhunzawm mek a ni.
SAFF U-17 Women’s Championship 2025-a Nupuii a kal tur thu hi July 10 khan Mizoram Football Association (MFA) chuan an social media-ah an tar lang a. “International competition-a assistant referee ni thei kan nei hi kan chhuang hle a, a duty tha taka hlen turin duhsakna sang ber kan hlan,” an ti.
Thawhlehni khan inelna neihna tur hmun a thlen thu hi puang lehin a mawhphurhna tha taka hlen turin duhsakna a hlan nawn leh bawk.
SAFF U-17 Women’s Championship 2025-ah hian ram pali – Bangladesh, Bhutan, India leh Nepal te an inel dawn a. Vawi hnih theuh an intum kual dawn a, a sang berin nomawi an la dawn a. Inelna hnuhnung ber kha U-16-a kalpui niin Bangladesh an champion.