Aizawl: MZP chuan nimin khan thuchhuah siamin, August 18, 2025 zana Mizoram luh tum hnam dangin Vairengte ILP check post-a buaina siam an duh loh thu an tar lang.
MZP chuan tun hnaiah Mizorama lo luh tum hnam dang an pung hluai chu an ngaih a tihthat loh thu an sawi a. Assam sorkarin Bangladesh atanga dan lova music pem lutte hnawhchhuah an kalpui avangin Mizoramah hnam dangi an tam taa an ngaih thu sawiin, uluk leh huaisen taka che turin Mizoram sorkar an ngen.
Hemi chungchangah nimin khan MZP chuan Home Minister K Sapdanga chu a pisa-ah kawmin Thawhtannia thil thleng chungchang an sawipui a. Assam-in dan lova an rama awmte an hnawhchhuah mek hi Mizoramin a tawrh theih avangin ramriah sipai tam zawk duty dah tur leh Assam atanga lo lut turte chu uluk taka an document-te check tura an duh thu leh, Central Armed Police Force (CAPF) sipai lak chhuanlama dan lova hnam dang an lo luh loh nan theih tawpa inven a tul thu thlen an ni.
Home Minister hian theih tawp chhuah a tum thu leh duty pawh an uluk thu, MZP hruaitute a lo hrilh a ni.
MZP chuan August thla chhungin mi 2,573 hnenah ILP pek chhuah niin, nimin khan mi 544 hnenah pek a ni. August thla chhunga ILP pek chhuah hi chawhrualin mi 140 bawr vel zel a nih lai a, niminpiaha mi 544 zet an lo lut thut chu an ngaih a tihthat loh thu an sawi.
MZP Headquarters, Sub-Headquarters leh Branch-te pawh August ni 19, 2025 atangin ILP pek chhuahnaah a theih ang angin duty-te an tawiawm ve nghal dawn tih an tar lang bawk.