Aizawl: Northeast Frontier Railways-a Chief Engineer (Construction) Vinod Kumar chuan Sairang Rel Station-ah khualzin thlengte chu lei hnuai platform atanga chhukin ILP Check Post paltlang zel a nih tur thu nimin khan Chief Minister Lalduhoma a hrilh.
Northeast Frontier Railways hotuten nimin khan chief minister chu CMO-ah kawmin Sairang Rel Station sak hna an thlen tawh chin leh station awm dan tur chipchiar takin an hrilhfiah.
Kumar sawi danin rel station-ah hian platform inkalpawh tawnna tur subway pathum a awm tur thu te, flyover bridge a awm loh tur thu te, khualzin thleng tharte chu lei hnuai platform atanga chhukin ILP Check Post paltlang zela chhuahna siam a nih thu leh, bungraw hlanna platform lamah state taxation hmunhma tur dahna hmun tur siam a nih thute a sawi.
Chief minister-in Union Railway Minister Ashwini Vaishnaw hnena a lo thlen tawh angin Sairang Rel Station hi world class station ni tura thuam that chhoh leh tur a ni a. Prime Minister Narendra Modi-a’n hawng tura beisei a ni a, chumi atana inbuatsaihnate pawh an sawi nghal a ni.
An inkawmnaah hian chief minister hi Adviser to Chief Minister TBC Lalvenchhunga’n a tawiawm a ni.