Tun hnaia Mamit district chhung, Saikhawthlir khaw bula Assam police leh forest department-in rubber kung phun an tihchhiat chungchangah Assam-a Hailakandi leh Mizorama Mamit district pahnih aiawhte an inbia, thiamthu an sawi ve ve.
Thawhlehnia Bairabi Sub-Division (Civil) Conference Hall-a an inbiaknaah Mamit Bawrhsap K Laltlawmlova chuan Mamit district chu reserved forest area huam chhunga a awm thu leh Mamit district chhunga mipuiin reserved forest area hmang tangkai turin dikna chanvo tam tak an neih thu a sawi a. Tun hnaia Assam Police leh forest department-in Saikhawthlir khaw bula rubber kung phunte an tichhiatna hmun chu Kawrthah Forest Division hnuaia awm a nih angin GIS Cell, EF&CC Department Mizoramin map a siam chhungah a tel thu a sawi.
Hailakandi Bawrhsap Abhishek Jain chuan tun hnaia Saikhawthlir khaw bula rubber chingtuten buaina a tawhna hmun chu state ramri chungchanga buaina a nih loh thu leh reserve forest area-a plantation kalpui a nih avang zawka inhriatthiam lohna thleng a nih thu a sawi.
Tun hnaia Assam Police leh forest department-in rubber phun an tihchhiat chhan chu he lai hmun hi Inner Line Reserve Forest, Gharmura Range, Hailakandi district huam chhung a nih thu leh Reserved Forest Act, 1980 hnuaia humhalh niin hemi Act-a Section 2A chuan rubber kung leh thil dang phun a khap tlat vang a nih thu a sawi a. Assam state chhungah kilometre 1.5 vela thui rubber kung an phun hi Forest Conversation Act, 1980 kalh a nih theih dante leh National Green Tribunal (NGT) ngaihmawh tak a tlin theih thu a sawi bawk.
An inkawmnaah hian tha taka buaina chin fel dan tur leh hun lo kal leh zelah pawh buaina dang a thlen nawn tawh loh nan ruahmanna fel zawk siam dan tur ngaihtuah nise an ti a. Thuneitu sang zawka thlen dan ngaihtuah nise an ti bawk.