Aizawl: Mizoram Kuhva Chingtu Pawl chuan tunlaia foreign kuhva smuggling-a sumdawng an la awm reng chu a pawi an tih thu sawiin, ramleilungfa kuhva chingtuten an kuhva thar chhuah hralhna kawngah harsatna an thlen thin thu an sawi.
Nimina thuchhuah an siamah Mizoram Kuhva Chingtu Pawl chuan, kuhva rah thar a hun leh dawn a, kut hnathawk tuten harsatna an tawh loh nan Mizoram sorkara thuneitu leh police-te pawhin nasa leh zualin hma la tura an duh thu leh an beisei thu an tar lang.
Tun August thla chhung ngei pawha police leh Assam Rifles ten hmun thum ngawta dan lova foreign kuhva ro tawlh luh an man thei chu Mizoram Kuhva Chingtu Pawl General Headquarters chuan lawmawm an tiin, Mizoram Police leh AR te rintlakzia leh fakawmzia a takin an hmu chu lawmawm an tih thu leh thlamuanthlak an tih thu an sawi.
MKCP member zawng zawngten foreign kuhva ro dona kawngah hma chak zawk a la turin headquarters chuan ruahmanna a siam dawn a, khaw hrang hranga MKCP Branch leh member-te foreign kuhva ro smuggling do turin lo inkau reng turin an chah bawk.