Rei tak a ngawih hnuah Alexander Isak chu a tawng chhuak ta a, Newcastle United nen inkungkaihna tha tak an neih theih tawh loh tur thu a sawi chhuak.
Social media-a a thil sawi chungchangah hian Newcastle United pawhin thuchhuah an nei ve nghal a, Isak-a thusawi chuan an club a tihhnual viau thu an tar lang.
Thawhlehni zana PFA Award semah Premier League team of the season-ah Isak hi Magpies player zinga tel chhun ni mah se award semnaah inlan a inlan lo.
August 1 khan Premier League champions Liverpool chuan £ maktaduai 110-in lei an dil, hei hi Newcastle-in an hnar a, hralh an tum loh thu an sawi a, hemi hnuah Reds hi an che leh lo.
PFA Award semnaa a kal ve loh chungchang a sawi chhuah rualin Isak chuan a dinhmun a sawi a. “Transfer chungchangah ka ngawi a, chutih laiin ka chungchang nasa takin an sawi darh a, an duh dan danin an lo puang bawk a. Thil nihna tak chu hei hi a ni, Newcastle hian ka hnena thil min tiam an bawhchhia a. Ka chungchang a dik lo zawng leh a nuar zawngin media lamin an puangzar char char bawk. Thutiam an bawhchhiat chuan, an laka rinna ka lo nghah zawng zawng pawh a chhe nghal vek a, Newcastle nen hian inkungkaihna ṭha tak a chhunzawm theih tawh dawn loh a ni,” a ti.
Isak a tawng chhuah hnu lawk hian Newcastle pawhin thuchhuah an siam a. “Vawiin tlaia Alexander Isak-a’n social media-a a thu tar lan avang khan kan hnual hle a. Thil chiang tak pakhat chu, Alex hi kan hnena contract la nei a ni a, a lakah hian thutiam dang engmah kan nei lo a, tun nipui bazara a chhuah theih tur chungchangah thutiam engmah club official-te pawhin kan nei lo. Kan player tha berte hi chelh kan duh a, chutih laiin an duhthlanna pawh kan ngaihthlaksak thin. Alex leh a agent nena kan inkawm pawhin Newcastle tana tha tur ber chauh kan ngaihtuah,” an ti.