Thawhlehni chhun dar 12:30 vela Maubawk Kawn venga cheng, Runliani (80) tual thih kaihhnawihah police in mi pathum chu thu zawhfiah turin an kawl mek.
The Zozam Times -in police atanga thu a dawn danin, Runliani (Luti) w/o Lalsanga (L) chu niminpiah khan an chenna in chhunga thia hmuh a ni a. He tual thihna chungchangah nimin thleng khan police chuan mi pathum manin, thu zawh fiah turin an kawl mek a. Hnu chhui lai mek a nih avangin police chuan thu zawh fiah tura an kawl mipa pathumte hming tar lan an la rem ti va. An kawl mekte erawh Maubawk chhehvela mite tih chauh an sawi thei rih a ni.
Tar lan tawh angin, Runliani hi an chenna in chhungah thia hmuh niin, a nghawng vei lamah chema vihna hnuhma a awm bakah, a hrawk ding lamah inches nga vela zaua zaina hnuhma hmuh a ni a. Pawikhawihna thlen thu hi khawtlang hruaitute hriattir an nih hnuah Police lam hrilh nghal a ni a. Thil buaipui ngai hrang hrang police leh forensic lamin an buaipui nghal.
Runliani hi a fanu leh a tupa nen a khawsa niin, an inhnuaiah a fapa a cheng bawk a, an chenna in piahah huan an nei a, huan a a fanu a kal hlana thil thleng nia ngaih a nih thu dawn a ni a. Thawhlehni khan Maubawk Kawn venga an chenna inah lumen a nih hnuah, nimin khan vui a ni.
Hetih lai hian, nimin khan Mizo National Women Front (MNWF) leh MHIP Gen Hqrs te chuan thuchhuah an siam a. Rawng taka Runliani thah a ni chu pawi an tih thu an sawi a, tualthattu hi chhui chhuak a, a na thei ang bera hrem an phut tih an tar lang.