Ruben Amorim chuan an player lei thar, Benjamin Sesko chu Manchester United tan a langsar hle dawn niin a sawi.
Manchester United hian Slovenia striker kum 22 mi, Sesko hi RB Leipzig atangin £ maktaduai 73.7 ($ maktaduai 99) sengin an la lut a, Pathianni zan khan league-ah a vawi khat nan inlanin Arsenal a hmachhawn nghe nghe.
Old Trafford-a an inkhelh hma khan Amorim-a chuan Premier League defender-te tan buaipui tham a nih tur thu a sawi lawk a, Arsenal hmaah erawh darkar chanve vel inlanin goal thun thei bik a nihna a la lantir zo lo.
1973-74 season hnua an season hman chhiat ber an hmang liam chiah a, hei vang hian Amorim chuan dinhmun tha taka din leh theih a tum hle a. Sesko bakah hian mi thar tho, Matheus Cunha leh Bryan Mbeumo te chu tlar hma lama rinrawl turte an ni.
Portuguese coach chuan, “Football khelh dan chi hrang hrang a thiam a, la zir belh tur tam tak nei mah se a hma hun hi a êng em em a. Ben hi hun rei tak chhung chu Manchester United striker rinrawl a ni chho dawn tih ka hre thei,” a ti.
“A rintlak dawn tih kan hriat vangin sum tam tak sengin kan la lut a ni a, heti lai hmunah hian thawnthu tam tak a ziak ngei dawn tih ka sawi ngam,” a ti bawk.
A sawi zelnaah, “Arsenal hmachhawn turin inpuahchahna hun a nei tam vak lo hle a, chuti chung chuan a inpeih tawh tho a. A taksa lam chu a inpeih chiang tawh hle a, hei hi kan league khelhah hian a pawimawh hle a. Thil min zawt chiang nasa hle a, hei hian ngaihtuahna seng nasa mi a nihzia a tilang,” a ti.
“Chhunah hian fitness lampang a buaipui ngar ngar zel a, hei vang hian inkhel tur pawhin a inpeih tawh a. Bul a tan dawn nge dawn lo a la hriat chiah loh a ni,” tiin Amorim hian a sawi.
Sesko hian German club RB Leipzig tan season hman zawh takah khan goal 21 a thun thei a, hei vang hian Amorim pawhin a striker neih thar lakah hian beiseina a nei sang hi a âwm lo hran lo.