Aizawl: PHE Minister Prof. Lalnilawma chuan Mizoram mipui hnena tui thianghlim pe thintu an nih angin an hnathawh hi a pawimawh a, inthlahdah emaw, induh thei an ni lo tih a sawi.
Nimin khan PHE minister hovin Mizoram hmun hrang hranga PHE department hotute leh engineer-ten department-in harsatna a tawhte sutkian dan tur sawi hovin online meeting (video conferencing) an nei a. Thutkhawmah hian minister chuan tui thianghlim tel lovin mihring a nun theih loh avangin leh PHE department hi Mizoram mipui hnena tui thianghlim pe thintu a nih angin, an hnathawh hi a pawimawh a, inthlahdah emaw, induh thei an nih loh thu a sawi.
Minister chuan, “Mipui mamawh ang zawng zawng pe thei lo mah ila, mipui harsatna sukiang turin theihtawp kan chhuah a ngai a ni,” tiin a thawkte chu mipui tana ding an nih avangin an mamawh leh harsatnate an thlenin tha takin lo dawngsawng turin a chah.
Minister chuan department-in harsatna an tawh avanga tui supply mumal mipui an pek theih loh changin an harsatna tawhte hi mipui hriat turin rang taka an puanzar thin turte, khaw hrang hranga an harsatna tawhte chu a rang lama hotute hnenah thlen a, a sut kian dan tur a rang lama ngaihtuah a tul tih a sawi a. Department-in hma an sawn theihna turin ngaihtuahna an sen a tul a, chumi tipuitling thei tur chuan an dinhmunah theuh theihtawp an chhuah a tul tih a sawi bawk.