Aizawl: Mizoram tan telephone tower leh online exam centre tam zawk awm theihna tur leh India khawpui thenkhata Mizoram House sak dan tur sawipuiin nimin khan Chief Minister Lalduhoma leh Daily Giri, Chief General Manager, BSNL, NE-1 Telecom Circle an inkawm.
CMO-a an inkawmnaah hian Mizoram hmun kilkhawr zawka zirlai leh hna zawng laiten online exam an neih dawnin, Aizawl leh district khawpui an pan thin a. He harsatna hi sutkian a nih theih nan tunhmaa BSNL Exchange ni thinte Online Exam cum Skill Training Centre-a leh an remti a. Mizoram hmun kilkhawr zawkten internet signal tha an neih ve theih nan tower eng emaw zat phun belh ni se an ti bawk.
Tunah hian BSNL hian Mizoram tan tower 53 phun belh tur an nei sa a. A phunna tur hmun hi sorkar ngaihpawimawh hmasak hmunah te phun phawt tur niin, a tul angin tower hi dil belh zel theih a ni.
Daily Giri chuan Mizoram rel kawng leh rel station tharte tana mobile signal tha chhawpsak chungchangah hma an lak mek thu Chief Minister a hrilh.
India ram khawpui danga BSNL rama Mizoram House emaw hostel emaw, neitu nihna intawm hmanga din chungchang pawh an sawi a. A kalpui dan tur hi GAD lamin lo duang se, BSNL nena inbe zel chunga kalpui tur a ni ang.
Daily Giri hi kumin July ni 10-a Chief Minister leh BSNL Chairman & Managing Director, A. Robert J. Ravi te New Delhi-a an inkawmna bawhzuia Mizorama lo kal a ni.