Aizawl: PWD Minister Vanlalhlana leh Aizawl West Joint YMA hruaitute chuan Vaivakawn traffic tawt tihziaawm nan PWD ruahmanna kalpui dan tur an sawi ho.
Inrinni zingkara Conference Hall, Vaivakawn Cultural Centre-a thutkhawm hi Jt. YMA, Aizawl West President Rualhlupuia’n kaihruaiin, Er. Robin Lalrinawma, CE leh Er. Lalengzuali, Superintending Architect-te chuan ruahmanna kalpui dan tur an sawi zau a.
PWD Minister Vanlalhlana chuan lirthei pung zel avangin Vaivakawn traffic junction-ah pawh traffic jam avangin lirthei khalhtuten hun tam tak an khawhral phah thin tih a sawi a. Traffic jam avanga he kawng pawimawh tak zawhtute harsatna sutkian a nih theih nan khawtlang hruaitute rawn chunga ruahmanna siam thuai a tul thu sawiin, khawtlang leh ram tihhmasawnna tura Aizawl West Joint YMA hruaitute inhawnna chu lawmawm a tih thu a sawi.
Thutkhawma tar lan a nih danin, Vaivakawn traffic junction helna tur ruahmanna kalpui theih a nih chuan Vaivakawn Field sir zawhin, Vaivakawn Bazar building leh Vaivakawn bus stand chhak, Dawrpui Vengthar panna kawng inkarah lei metre 75-a thui dawh kai tur a ni a. Lei zau lai ber hi metre 15.5 niin a zim lai ber hi metre 7.5 a ni a, ban 14 a awm dawn a ni.
Thutkhawmah hian lei dawh tur hian Vaivakawn Field huam chhungah ban (pillar) awm lo tur leh lei chu field hmangtute tan hnawk pha lo tura siam a tul thu tar lan a ni a. Lei dawh kaina hian traffic jam nasa avanga mipui harsatna sutkian a nih dawn bakah khawtlang tan hmasawnna hrang hrang a ken tel dawn avangin Aizawl West Joint YMA hruaitute chuan a thuphungin PWD Minister ruahmanna chu an thlawp thu an sawi.