Aizawl: All Mizoram CSS Employee Coordination Committee (AMCECC) chuan an thil phutte tihhlawhtlinsak an nih loh avangin an ruahman lawk angin nimin atangin sorkar laka lungawi lohna lantirin a huhova chawlh (mass casual leave) an la tan.
Thudawn danin CSS hnuaia thawkte an chawlh avangin sorkar damdawi in hmun hrang hranga damlo enkawl kawngah harsatna nasa tak a thlengin, PHC/ UPHC leh Sub Centre eng emaw zat khar a ni a. Hei bakah hian zirna lama thawktu tam zawk an chawlh avangin sikul 500 chuangah zirna kalpui theih a ni lo va. DEO leh DPC office tam zawk pawhin hna an thawk mumal thei lo niin an sawi.
Hei bakah development works khawihtu department – RD& AD, UD& PA, Agriculture, Horticulture etc., hnuaia CSS thawktute an nawrh tel avangin heng ni 100 inhlawhna, self help group kaihhnawih, digital crop survey, in sak tanpuina etc te kalpui theih a ni lo va. Social welfare hnuaiah Women & Child Development a hna kal mek a chawl vek bawk.
AMCECC chuan ‘Regularisation of CSS Employees Scheme, 2024’ hi a taka an hman thuai theih nan leh siam rem ngaite siam remsak turin sorkar an phut a. He scheme hi AMCECC affiliated association leh member ni loten hman ve an remti lo va. AMCECC hmalakna zawm loten he scheme hi hman tum lo turin an hriattir a. Hman luih tum an lo awm a nih pawhin a tawp thlengin a dodal tur thu an sawi bawk.