India sorkarin Online Gaming Act, 2025 hman tan a nih thu a puang a, hei vang hian India cricket team sponsor lian ber, Dream11 chuan an kalphung an thlak danglam a. Hetiang a nih takah chuan India team an sponsor zui dawn ta lo a, Board of Control for Cricket in India (BCCI) chuan jersey sponsor man an tisang zui a, a duh an zawng nghal.
Dream11 leh BCCI hian kum 2023 khan kum thum chhung atan India cricket team sponsor turin thuthlung an lo ziak tawh a. Hman ni deuha sorkarin Online Gaming Act, 2025 an hman avang khan online gaming buaipuitute chuan pawisa thap vel an titawp zui nghal.
BCCI hian India cricket team sponsor man thar an bithliah vat a, ICC leh Asian Cricket Council (ACC) inelnaa ram pahnih inkhelh bika sponsor-na tur chu Rs. vaibelchhe 3.5 niin ram pahnih aia tam inelnaah Rs. vaibelchhe 1.5 a ni ang.
A hma khan ram pahnih inkhelha India team sponsor-na chu Rs. vaibelchhe 3.17 niin ram pahnih aia tam telnaah chuan Rs. vaibelchhe 1.12 a ni thung a, BCCI-in sponsor man tur an duan thar hi a hma ai chuan a sang hret a ni.
An kalphungah chuan ram pahnih inelnaah hian sponsor-tute hming hi ICC inelnaah an kawr hmaah an tar lang thin a, ACC inelnaah chuan an kawr banah chauh an tar lang thung a ni.
BCCI-in ruahmanna an siamah chuan sponsorship hi kum thum chhung atan an zawng a, he mi hun chhung hian vawi 130 vel an khel hman tura ngaih a ni a. Heng inkhelh turah hian kum 2026-a T20 World Cup te, 2027-a ODI World Cup an khelh turte pawh chhiar tel a ni.
Tuna sponsor man bithliah thar hi an hmang a nih chuan BCCI hian a tlem berah Rs. vaibelchhe 400 vel chu an la lut thei tura ngaih a ni.
India cricket team sponsor-tu lian ber ni thei tur hi BCCI chuan tun hnai kum thum chhunga an sum che vel Rs. vaibelchhe 300 tal an ni a ngai tih an puang a ni.