Mizote hi Pathianin hnamah min siam a, ram pawh min pe a, kan pi leh pu atanga tuma chuh buai lohin he ramah hian thlamuang takin kan awm a ni tihah hian kan chiang a. Kan mawl zawk leh chak loh zawk avangin hnamdang awpna hnuaiah kan lo awm ta a. India ram kan lo ni ta a ni. Kan thinlung erawh midang awpna hnuaiah hian a hmin thei thlawt lo.
India zalenna sualchhuaktu Mahatma Gandhi ten India ram in awp dan mawi taka sawiin pangpar huan mawi takah pangpar chi hrang hrang chu mahni mawi dan ang berin kan par a ni han ti thin mahsela kan la hmin chuang lo va. India union hi ziakah pawm mah ila kan thinlung phekah hian a inziak fiah thei tlat lo va. Hetiang hi kan thinlung anih mek laiin pangpar huan mawi takah chuan pangpar dang dip hlum tura Lotus chauh par tir tumtu ten thuneihna an han chan phei chuan kan rilru a bet lo lehzual niin a lang. Tuna sorkar lai hian Indian federal system nuaibo tura zawi zawia hma an la lai han hmuh phei chuan ar rul hmu ang maiin ngaih tha lo in kan dak ar ar hlawm anih hi. Indian union hi pawm harsa kan ti a. Federal system avang hian India ah kan awm thei tawk tawk a. Mahse, he federal system hi ti bo hret hret turin BJP sorkar hian hma a la chho mek a. Khawvel ram map te hi history ah a danglam chho fo zel a ni tih pawh kan hmu ve reng a. Engtikniah emaw chuan Pathianin a hranpa a kan awm hi a la remti ang tih beiseina chhungrilah kan nei ru tlat a. Chu thinlung chhunga kan hlauhthawn thil awm chu central hmalaknaah a lang fiah hret hreta kan hriat si avangin engemaw hlekah kan tang hru zel ni berin a lang.
India danpui khawih danglam anih apiang hian engangin nge chu thinlunga hranna chu a rawn khawih tih hi kan lo bih ve vat zel bawk. India union hi kan thinlung tak taka pawm thlap chu ni ila vawiin nia kan sawi huai huai Forest Conservation Amandment Act 2023 tihte hi engmah inhnialna tur a awm lo. Kan forest te chu kan ta bik hliah hliah nia kan hriat avangin India lakah hian kan ui ngawih ngawih a. Hetiang thinlung hi kan nih tlat avangin thil ri hlekah hian kan phu suau thin ni berin a lang. Thenkhat chuan thliarkar rilru an ti mai thei. Mahse, kan chhungril chu chu a ni si.
Hmasawnna pawh kan duh a. Mahse kan ram khawih chhia a, kan tu leh fate tana kan reserve ruk ngawih ngawih ram hi India danpui hnuaia nghet taka central-in a duh a maka a phin darh bawrh bawrh tura kan han ngaih hian kan rilru a ti na a. Khawvel hmasawnna uma tlan ve pawh kan duh. Mahse, kan ram ti chhia a, a chan zawnga hmasawnna chu kan phal rih lo a ni. Kan thinlung takin reserve neia hmasawn kan duh a ni. Thil insual hi a ril a. Tuna kan sawi luai luai FCAA te hi kan rilru chhungrilah vittu awm angin kan hmu tlat.
Chutiang chu kan nih avangin tuna kan sorkarin he FCAA a han pawm a, vai lawm zawnga a han lem duak duak mai hi chhak chhuak leh se kan duh a. Mipui thinlung a hliam tawh hi tuam dam leh thuai se tih hi ngaihdan tam ber niin a lang. Heng thil hi political party thil a ni lova. Kan tu leh fa lo la awm zel turte hmakhua a ni tih i hre bawk ila.